Hajiji (kotolu, wanan) pinapatahak tontiil walai Sabah Maju Jaya (SMJ) kuminaa di Irwan Bakir, 46, id Kampung Guruh-Guruh, Sipitang.
SIPITANG: Boyoon Montiri, Datuk Seri Haji Hajiji Haji Noor pinapawara’ koponuridongan 40 Walai Mesra Sabah Maju Jaya (SMJ) montok tikid koiyonon Lintuhun Undangan Pogun (DUN) do toun tiso’, pitopongon di 20 walai sontoun pogulu diti.
Ka disio, miampai koinsanai kikiro 3,000 unit Walai Mesra SMJ maan turidongo’ do toun tiso’ montok papasaga’ lobi kogumu’ tulun mosikin ‘tegar’ amu’ pasanganu walai montok oonuan ponguhupan dilo’.
“Pogulu diti nonuan tokou tikid koiyonon DUN soginumu’ 20 Walai Mesra SMJ montok tinimungan mosikin tegar, nga’ toun tiso’ ruhangan tokou mantad 20 kumaa 40 tinan walai.
“iti sabab no do oilaan tokou ogumu’ po aiso’ walai om momoguno kopongobian tokou. Inggisaman tokou 3,000 wlaai toun tiso’ montok diolo’ i posompini’ id kategori mosikin tegar,” ka disio ontok pinopoimagon Mitingan Tikid Toun Parti Gagasan Rakyat Sabah (Gagasan Rakyat) Bohogian Sindumin, id Dataran QSS, do hiti di konihab.
Minoboros isio, inggisaman dilo’ miampai ogumu’ po inggisaman suai kaampai kopohompit kopoburuan ‘modal insan’ naantakan no id Koporintaan Gabungan Rakyat Sabah-Pakatan Harapan (GRS-PH) Plus.
Pinointalang disio, kopoindalanan inggisaman montok koundaran mogigiyon dilo’ kopiongoi di inggisaman po’ompus koporintaan pogun buruanon disio id kopongobian konosipan mogigiyon om mogowit koburuon id pogun diti.
Ka disio, koporintaan buruanon pembangkang pogulu diti amu’ pinopoindalan nunu-nunu inggisaman i koowit kukmaa kopongobian konosipan mogigiyon tu’ lobi moningkanan kumaa mogihum kasalaan koporintaan om lansanon nokopogulu.
