Hajiji miampai Montiri Kabinet Sabah minananud di Tun Juhar pinopoindalan gimik kopoimpuunan kopihondot Pamaramaian Tadau Sabah 2024 id Padang Merdeka, Kota Kinabalu, di songkosodop.
KOTA KINABALU: Kapamaramaian Tadau Sabah nopo nga’ kointalangan sunduan kabansaan tulun Sabah montok maganu kagabasan mantad mogkukuasa’ potilombus dino amu’ mangakun di nunu-nunu koponugatan labus kohondot pogun diti, ka di Boyoon Montiri, Datuk Seri Haji Hajiji Haji Noor.
Minoboros isio, kobontugan Sabah id Pisompuruan Malaysia amu’ aanu mombohit tu’ mogigiyon pogun diti minomili’ montok minampai monuridong Malaysia.
“Tadau Sabah i ramaion miampap Tadau Kabansaan do ko 31tw Kowalu’ (Magus) nopo nga’ tadau di kisusuyan kahandaman kopio. Ilo’ nopo kointalangan sunduan oupus pogun (patriotisme) tulun Sabah montok maganu kagabasan mantad mogkukuasa’ tu’ Sabah nopo nga’ somboogian mantad Malaysia.
“Timpu dumontol Sabah id longon tokou, mantad dilo’ kanou tokou no oinsanan lolobi sukod wagu popiuhup ginoris, mitokin lihawa, minggisom miampai poinsonong papatantu’ pogun diti kotilombus koburu’ om komogot nogi’ mogigiyon toririmo misompuru.
“Koporintaan tumilombus minggisom montok mongingkawas rontob koposion mogigiyon, monginggirot sistom balajaran, popoburu’ tongo’ kogogonopan (infrastruktur) di lobi kosonong om papatantu’ koburuon di aadang id pototongkop pogun,” ka disio kopihondot Pamaramaian Tadau Sabah 2024 id Padang Merdeka, do hiti, di kosodop (totuong tadau Koonom).
Boyoon Montiri minoboros, kapamaramaian Tadau Sabah okon nopo ko’ mongunsikou naangayan nga nogi’ mamagatang om momuhondom kawagu pinamanahan anaru i nawaya’an montok minonigampot kinopomorintaan sondiri.
Minoboros isio, koporintaan pogun do noondo diti toririmo minggisom mongingkawas ikonomi om monginsonong rontob koposion mogigiyon.
“Tuduan tokou nopo nga’ atalang, ilo’ nopo nga’ mongingkanan koponsolon om kasasanangan mogigiyon. Otumbayaan tokou, miampai piromutan ogirot miampai koporintaan Pisompuruan, kopoinsanang ilo’ di koinsanai pitorinaan kaampai kopohompit Pibatosan MA63, toi haal ngaawi’ poinhompit do koburuon om montok pogun,” ka disio.
Daamot dilo’, Hajiji minoboros, koporintaan pogun tumilombus monokodung katatapan koburuon Sondikoton Sabah Maju Jaya kopingoi di sunduan angkab Malaysia Madani i mokimamaha’ do koburu’ pogun, kitonggungan akawas id nayatan pomogunan potilombus dino kosili pomogunon di pantangon om umboyoon, ka disio.
“Nogi’, asil kopomuruanan pogun i osuau papaapu’, nokoposili Sabah rubpuon papaapu’ labus om suang pogun i manahak nogi’ kosiwatan pakarajaan kumaa mogigiyon pogun diti. Sabah nakaramit kopoopuan soginumu’ RM11.34 bilion padarapas mogisusuai siktor id toun 2023 om nokoposurat asil nopuhu pogun somok RM7 bilion ontok toun di miagal.
“Noondo, koporintaan pogun masaan mongukab kosiwatan Ikonomi Obulou (Ekonomi Biru) kopohompit pongukaban tataba’ rahat sabaagi intodonon ikonomi wagu nogi’ asil nimbluayan i aanu popoimbulai mantad pomogunan dilo’. Kopongukaban dilo’ do wookon inggisaman po’ompus om apagarat montok mongingkawas kosunion ikonomi sabaagi pomoruhang kumaa intodonon di poinharo mantad,” ka disio.
Molohingon Pogun Sabah (TYT), Tun Juhar Mahirudin pinopoimagon ramai kinopohimaganan Pamaramaian Tadau Sabah 2024.
Nokotindapou nogi’ sawo disio, Toh Puan Norlidah R.M Jasni om sawo di Boyoon Montiri, Datin Seri Hajah Juliah Salag.
Kinopohimaganan Tadau Sabah do ko 31tw Magus pinahabar do koporintaan Sabah di wulan Ko’onom (Mahas) katatalib.
