Kokikitanai ontok poindalan pirurumaan.
KOTA KINABALU: Ababayan Kopoimpuunan Wulan Kabansaan Tadau Sabah om Kimpin Pokili Bondira’ 2024 maan poindalano’ mimpuun jaam ko 7.30 kosuabon, tadau Kaapat diti.
Luguan Urusetia ababayan dilo’, Dr. Benedict Oliver Lidadun minoboros, mogisusuai ponuang maan poindalano’ kopihondot ababayan dilo’ kituduan montok poposindak sunduan mongupus pogun kosuul no id nayatan mogigiyon Sabah.
“Wookon ponuang Ramai Kopoimpuunan Wulan Kabansaan Tadau Sabah om Kimpin Pokili Bondira 2024 nopo nga’ kopoikidan bondira, pokikitanan sinasawat, kapamaramaian mantad susumikul sikulan om kopoungkoyutan Konvoi Kembara Merdeka Jalur Gemilang, Koupisan Kopointalangan Pogun Sabah.
“Talib dilo’, ontok jaam ko 3 sodopon, haro o tinonudan tokou buruanon di Mayor Bandaraya Kota Kinabalu, Datuk Seri Sabin Samitah i popoikid Jalur Gemilang om Bondira’ Sabah kumaa momumukadai om tulun ginumuan id pososorili’ Jalan Gaya.
“Alapon ku oinsanan i haro id pososorili’ Kakadayan Agayo Kota Kinabalu, kanou tokou no rumikot mooi ampai mamaramai om popokito pogisompuruan tokou lolobi podi toun diti tu’ mamaramai tokou nogi’ do Tadau Sabah montok kumoinsan nogi’,” ka disio soira’ rinubaan media katalib pirurumaan miampai SABAHfm id Kompleks Bersepadu Komontirian Komunikasi do hiti, di tadau Koiso’.
Daamot dilo’, Benedict minongunsub nogi’ tulun ginumuan do popokili Jalur Gemilang om bondira’ Sabah montok mamaramai om poposindak po do koyuon Tadau Kabansaan om Tadau Sabah.
“Toun diti nopo nga’ toun di kisusuyan kahandaman kopio sabab koporintaan pogun nga’ pinopoimagon nogi’ do Tadau Sabah.
“Mantad dilo’, kanou tokou no popokili goduduo bondira’ diti, Jalur Gemilang om Bondira’ Sabah id walai, id kampung, id linimput, id korita’ om id nombo-nombo nopo montok popokito kopurimanan oupus dati’ kumaa pomogunon tokou Malaysia om pogun tokou Sabah,” ka disio kawagu.
