Dr. Joachim (tanga’) pinapatahak watikah kinoposiilhan kuminaa di Francis om sinasi’ di Dr. Jamili.
KOTA KINABALU: Kumoduo Boyoon Montiri II po nogi’ Montiri Koporintaan Koiyonon om Pomuwalaian, Datuk Seri Dr. Joachim Gunsalam pinapatahak watikah kinoposilihan sabaagi Presiden Kounsol Kakadayan Penampang (MPP) kuminaa di Francis Chong id ababayan i pinoindalan doid Wisma Innoprise, do hiti di tadau baino’.
Monimpuun isio surupukaraja’ do ko 1tw Kowalu’.
Francis, 59, haro nawawayaan solinaid 37 toun id siktor surupukaraja’ koporintaan. Pogulu sinili Upisor Watas Penampang, nokoumbal isio minongigit karaja’ sabaagi Monguhup Upisor Watas (Koburuon) id Upis Watas Kudat om minomuruan watas okoro’ sabaagi Monguhup Upisor Watas Okoro’ Matunggong.
Dr. Joachim (poindikau, tanga) miampai di Dr. Jamili (poindikau, gibang) om i Francis guminambar miampai tongo’ mamaramit watikah kinoposilihan om oinsanan i nokotindapou id ababayan dilo’.
Dr. Joachim lumansan di Francis miampai puru karaja’ MPP moningingkawas karaja’ id kapatahakan surupukaraja’ bobos osonong kumaa mogigiyon id Penampang om pinopoilo do MPP kaanu sokodung ogirot mantad Komontirian.
MPP pikikiro poimpuunon di Boyoon Montiri Sabah, Datuk Seri Haji Hajiji Haji Noor do wulan Kohopod toun diti.
Dr. Joachim (kaapat, gibang) miampai di Francis pinopokito setifikit watikah kinoposilihan miampai tongo’ mamaramit di suai.
Minamaramit nogi’ do watikah kinoposilihan i Kumoduo Presiden, Noemi Deyna Johntren; Monunurat, Robert Malangkig om Kumoduo Monunurat, Andresia A. Lojingau.
Nokotindapou nogi’ id ababayan dilo’ Monunurat Pointatap Komontirian Koporintaan Koiyonon om Pomuwalaian Sabah, Datuk Dr. Jamili Nais; Kumoduo Monunurat Pointatap I, Stanley Chong; Kumoduo Monunurat Pointatap II, Faridah Giau, om Monunurat Osiriba’ (Koburuon), Johnny Samson.
