Dr. Joachim (poindikau, tanga’), Dr. Jamili (poindikau kaapat, gibang) guminambar miampai tongo’ Luguan Adat i nokotindapou Kurusus ‘Transformasi Kepimpinan Ketua-ketua Adat Cemerlang’ Siri 5 Toun 2024 montok Watas Ranau id Lintuhun Mogigiyon Ranau, di tadau baino’.
RANAU: Kumoduo Boyoon Montiri II po nogi’ Montiri Koporintaan Koiyonon om Pomuwalaian (KKTP), Datuk Seri Dr. Joachim Gunsalam mokianu tikid Kuut Mamasok Pogun (MAN) popowonsoi komogoton kopomuruanan id kopoinsingubasan pogoyuon abaal.
Minoboros isio, koyuon kabaalon di akawas kiguno posuulon mooi do kapanahak kokitanan kumaa tulun ginumuan songkuro puru karaja’ miagal tongo’ luguan adat kiharo tonggungan di akawas id kopoindalanan karaja’ di pinatahak.
Ka disio, pogoyuon abaal kopongingkawas kotumbayaan om pomusarahan tulun ginumuan kohondot di sinonong sistem kapatahakan surupukaraja’ MAN miampai poinpuli om koponigampot sondikoton Koupisan Haal Mamasok Pogun Sabah (JHEANS) doid kopobontugan adat tungkusan, momogompi’ tongo’ kopotutan Mamasok Pogun id kopotontuan Undang-undang Adat Mamasok Pogun toririmo atanud om pantangon.
“Komogoton kopomuruanan momoguno angkab, tinonggungan om inggisaman di po’ompus mantad oinsanan bohogian di poinhompit,” ka disio ontok pinopoimagon pomupusan Kurusus “Transformasi Kepimpinan Ketua-ketua Adat Cemerlang’ Siri 5 Toun 2024 montok Watas Ranau id Lintuhun Mogigiyhon Ranau, do hiti di tadau baino’.
Dr. Joachim (kotolu, wanan) pinapatahak setifikit pongunsikohan montok kinotonudan Luguan Adat mantad DUN N.37 Karanaan, sinasi’ dii Dr. Jamili (koduo, gibang), OKK Dominic (gibang), Majaran (koduo, gibang) om i OKK Muhasip (wanan).
Soginumu’ 203 tutumanud nokotindapou id kurusus dilo’ i nokopohompit tolu Lintuhun Undangan Pogun (DUN) — N.36 Kundasang, N.37 Karanaan om N.38 Paginatan.
Nokopogulu, Dr. Joachim i po nogi’ ADUN Kundasang minoboros, KKTP maya’ JHEANS momoduli’ kopio kogugunoon tongo’ luguan adat id kopotontuan surupukaraja’ diolo’ oinggarasan.
“Kohondot dilo’, nosili angkab ku om koupisan mooi oinsanan tutumanud nokohompit do tadau diti kopomoguno miampai poinsonong nunu nopo i nopinsingilaan solinaid duo tadau diti.
“Pinoilo oku, tonog’ mononomboros di naalap nga’ id nayatan di abaal montok papatahak uhu ngaawi’ di poinhompit kopiongoi di tuduan ababayan kurusus diti. Otumbayaan oku nunu nopo i nopinsingilaan om naanu po’ompus timpu kurusus diti sokuukuri’ do kouhup id kopoindalanan karaja’ om tonggungan miampai lobi oulud om oturundus suai ko’ kopongingkawas komilaan tinan om toilaan,” ka disio.
Dr. Joachim (tanga’) minamaramit tandamato mantad di Majaran sinasi’ dio’ Dr. Jamili (koduo, gibang) om i OKK Dominic.
Kurusus dilo’ pinaanjur montok manahak kopoilaan di kopoindalanan karaja’ om tonggungan tongo’ luguan adat montok papatantu’ surupukaraja’ id kinoiyonon diolo’ kosili lobi kiwaya’.
Suai dilo’, ilo’ po nogi’ nga’ iso’ mantad kurusus ‘wajib’ i poindalanon do JHEANS montok tongo’ luguan adat ngaawi’ id MAN Sabah.
Dr. Joachim minoboros, maya’ kurusus miagal diti, tongo’ luguan adat kapatahak surupukaraja’ kopiongoi di nopinsingilaan diolo’ om potilombus dino kopokito kokitanan om nubasanan korporat MAN di abantug.
Nunsub disio tongo’ luguan adat mooi do toririmo momogonop tinan di komilaan maso-maso, ‘inovatif’ id kopogihuman kosiwatan montok papabanta’ tinan di tongo’ haal ngaawi’ di wagu, nogi’ aparagat doid kopinsingilaan montok mongingkawas naangayan tinan, miagal do maya’ kurusus miagal diti.
“Nubasanan miagal diti mositi’ no do toririmo gunoon gisom kosili nubasanan i omitanan po nogi’ di tongo’ koombolutan tokou id MAN suai,” ka disio.
Dr. Joachim (koduo, wanan) minamaramit tandamato mantad di Tinus om sinasi’ dii Elmer (wanan0 om ilo suai katalib kinopointalangan Kotombuluyan Kembara Kumaa Bohogian Kikuasa’ Nokoiyonon Kounsol Watas Ranau.
Nokotindapou nogi’, Monunurat Pointatap Komontirian, Datuk Dr. Jamili Nais; Potunud JHEANS, Majaran Osman; Upisor Watas Ranau, Tinus Manggan; i Luguan Watas io’ OKK Muhasip Haji Ruman dii OKK Domonic Ganie om Lansanon Koburuon Mogigiyon N.36 Kundasang, Dounis Sani.
Talib dilo’, i Dr. Joachim tinanud di Dr. Jamili minokinongou kointalangan Kotombuluyan Kembara kumaa Bohogian Kikuasa’ Nokoiyonon Kounsol Watas Ranau, pinolombus di Upisor Eksekutif Kounsol Watas Ranau, Elmer Endra M. Sator.
