Hajiji osuau miampai puru surupukaraja’ koporintaan id Ramai Amanat om Pitimungan Puru Surupukaraja’ Koporintaan Pogun om Pisompuruan Toun 2024.
KOTA KINABALU: Slogan Sabah Maju Jaya (SMJ) i noondo diti nosili roroiton ginumuan, nopo nga’ batos komi oniba’ miampai pason agayo magangat tikid mogigiyon id pogun diti di mongupus komogoton om kalantaion.
Boyoon Montiri, Datuk Seri Haji Hajiji Haji Noor minoboros, akronim Sabah Maju Jaya pinili’ sabaagi sondikoton koburuon pogun diti sabab orohian posimbuat slogan i alaid no haro doid Jata Pogun kumaa koiyonon di lobi kasawat.
Nga’ kopurimanan isio kakaus tokuri’ soira’ haro bohogian angatantu’ i asaru moniisinda’ om papakadaada’ slogan ‘keramat’ dilo’, maya’ ponuratan toi komen ngaawi’ id media sosial.
“Ginawo om angkab tokou nopo papabantug om moningguun slogan keramat Sabah Maju Jaya mantad Jata Pogun i tikid timpu okito om abasa’ dati’, nga’ ogumu’ nogi’ i papakadaada’ dilo’ om mintong poinsiriba’ di inggisaman osonong i poburuon tokou dilo’.
“Osorouku, moniisinda’ om papakadaada’ slogan Sabah Maju Jaya, miagal koyuon dilo’ di amu’ mamantang, toi amu’ mongupus om nogi’ momohiihingi pogun dau sondiri’,” ka disio id Ramai Amanat om Pitimungan Puru Surupukaraja’ Koporintaan Pogun om Pisompuruan Toun 2024 doid Longkod Konvensyen Sompomogunan Sabah (SICC), do hiti di tadau baino’.
Hajiji minoboros, pogun ngaawi’ suai kaampai id pomogunan sombol-Indonesia, nga’ kiharo nogi’ slogan diolo’ sondiri’. Miagal do Sarawak pinopointutun slogan “Sarawak Maju Makmur” montok poposindak koburuon pogun. Selangor momoguno “Kita Selangor Maju Bersama”.
Ka disio, Terengganu minomoguno guasan “Terengganu Maju, Berkat, Sejahtera”. Melaka pinopointutun slogan “Bijak Laksana Tuah, Berani Laksana Jebat”, naamot Kedah minomoguno “Kedah Sejahtera – Nikmat Untuk Semua”. Pogun Indonesia minoningguun slogan “Terus Melaju Untuk Indonesia Maju”.
“Otopot nopo, kiguno tokou gumaras abantug nogi’ opinogot minggisom, lolobi no sabaagi puru surupukaraja’ koporintaan i pointopot om kitonggungan montok poposili Sabah lobi koburu’ om mogigiyon dau kikoburuon.
“Nunu nopo kobolingkahangan om kaantaban di rumikot, kiguno tokou monoguang dilo’ koinsanai miampai otoboi om kikomilaan. Kada’ kobingampawong di popiodu toi popotogod boogian aiso’ tinonggungan i mokimokito nopo dati’ do mogisongkiwal. Kiguno tokou moningkanan poinponu’ di inggisaman poposili Sabah lobi koburu’ om kalantoi,” ka disio pinoposotol.
Hajiji minoboros, talib somok tolu toun kinopoindalanan dilo’, Sondikoton SMJ nokoowit pogun Sabah kumaa waya’an di kohunung montok tumilombus koburu’ om tumunda’ maya’ pipiro potuduk ikonomi kopokito kinalantaion om kopokito tinonggungan doid kopoindalanan om koponguludan ikonomi pogun.
“Kopiongoi di tonggungan om sunduan Sondikoton SMJ, toun di nakatalib, nakalantoi tokou pinoposurat asil koporintaan pogun bobos akawas id susuyan kahandaman, i kiginumu’ RM6.973 bilion. Otopot nopo, waya’ dilo’ notimpuunan tokou pointonod minomuruan koporintaan pogun miampai nokoposurat ginumu’ asil pogun di agayo ilo’ nopo nga’ RM5.449 bilion di 2021 om RM6.960 bilion di toun 2022. Pointonod minomuruan Sabah, Koporintaan Pogun nakalantoi pinoposurat rikod abantug id sunduk kinopomuhuan asil bobos akawas id susuyan kahandaman solinaid tolu toun otuntud.
“Kinalantaion dilo’ tantu’ no do nounsub di karaja’ ogoris tongo’ pakakaraja’ koporintaan i pinopoindalan karaja’ om tonggungan miampai abantug. Bayahan kumaa diolo’ i toririmo minggisom kumaraja’, om pounsikou tu’ tonggungan toinsanan nokopogowit kinalataion di po’ompus,” ka disio kawagu.
Suai ko’ nakaanu asil pogun bobos akawas, ka di Hajiji, Sabah nga’ nakalantoi nogi’ pinoposurat kinoinsawaton kopoopuan notimung kiginumu’ lobi RM33 bilion, suai ko’ rikod pidagangan wookon di bobos akawas id susuayan kahandaman, kiginumu’ RM118.1 bilion di toun 2022.
Otumbayaan i Hajiji, miampai pipiro naangayan om gulampot ikonomi pogun di osonong om modingkotonduli’, Sabah kaanu mamagampot koburuon kosunion ikonomi kikiro 4 pihatus toun diti.
