Dr. Joachim (kotolu, wanan) ruminamit tandamato pongingitanan mantad di Potunud Koupisan Hal Tanak Mamasok Pogun Sabah, sabaagi Ponorikohon Puruankuasa’ Palan Anti-Ponupan Kotinanan JHEANS, Majaran Osman om sinasi’ di Monunurat Pointatap Komontirian, Datuk Dr. Jamili Nais (koduo, wanan).
KOTA KINABALU: Komontirian Koporintaan Koiyonon om Pomuwalaian (KKTP) minaganu tonggungan poinponu’ kumaa kopoindalanan mogisusuai inggisaman i poinsuang id Palan Anti-Ponuapan montok Kotinanan Koupisan Hal Tanak Mamasok Pogun Sabah (JHEANS) montok timpu 2024 gisom toun 2028, kid inggisaman popoindalan Palan Koburuon Sabah Maju Jaya.
Kumoduo Boyoon Montiri II po nogi’ Montiri KKTP, Datuk Seri Dr. Joachim Gunsalam minoboros, katatapan diti ponokotanda’ do tonggungan di ogirot kumaa kotonudan prinsip kopoindalanan di osonong, koburuon tonggungan di po’ompus, om ingigsaman po’ompus id kasahapan kasalaan ponuapan.
Minoboros isio dilo’ id Ramai Kinopoimpuunan Palan Antirasuah Organisasi JHEANS i pinaharo id Longkod Konvensyen Sompomogunan Sabah (SICC), do hiti di songkosodop.
Ka disio, ponuridongan palan diti nopo nga’ oponsol montok popoindalan angkab dilo’, potilombus dino kosili posiau oponsol id kopoguraan Hontolon Sabah Maju Jaya (SMJ).
Dr. Joachim (kotolu, wanan) pinapatahak tandamato kumaa kotinanan om sinasi’ di Monunurat Pointatap Komontirian, Datuk Dr. Jamili Nais (koduo, wanan).
“Palan diti kosili puralan oponsol kumaa kopoindalanan strategik, miampai popoloting laang ngaawi’ di kopiongoi do ababayan tinonggungan i poinggiroton maya’ kogorison ‘Kecemerlangan Tadbir Urus’.
“Miampai popiulud tinan om Hontolon Sabah Maju Jaya, palan diti okon nopo ko’ kosili sunsuyon montok monigampot rikoton, nga nogi’ koponuridong koyuyuon i kapagaras kopoindalanan osonong id surupukaraja’ koporintaan pogun,” ak disio.
Dr. Joachim minoboros, kopoinggirotan tinan tikid kukumaraja’ koporintaan, lolobi no id JHEANS, kotilombus migit di koburuon kopoindalanan di kiginoris koburu’, kopiongoi di ‘visi’ om ‘misi’ koupisan kumaa kalantaion kopoindalanan karaja’ pogun di iman-imanon.
“Miampai poinponu’ koondosan ku kokito tonggungan ogirot i pinokitanan do puruankuasa’ id kopoindalanan Palan Anti-Ponuapan Kotinanan JHEANS.
“Palan diti okon ko’ kopokito no do kinotopoton nga nogi’ sunduan tiim di ogirot id nayatan okinsanai pakakaraja’, miampai poinponu’ ginawo umampai inggisamna koporintaan pogun Sabah doid koponoibahan om kopomunsahan kobolingkahangan ponuapan.
“Koposotolan pomoruhan di patahakon kumaa kopotonoman pogogoyuon om koyuyuon osonong id kopoindalanan karaja’ abaal, popoindalan tonggungan kumaa prinsip ngaawi’ tinonggungan di akawas id nubasanan karaja’ sabaagi pakakaraja’ koporintaan pogun,” ka disio.
Ka disio kawagu, oponsol kopio montok iloon do palan diti okon ko’ gunoon nopo id nayatan koupisan.
Nga’, ka disio, kiguno ilo’ do tonudon om gunoon maya’ koinsanai nuludan kopoindalanan, kaampai no unit id siriba’ Koupisan miagal ‘Pentadbiran’, Kopotundaan, Mongindapu’ Tanak Mamasok Pogun, Institut Pingludaan Kuut Mamasok Pogun, om Kuut Mamasok Pogun Sabah.
“Kogompitan om tonggungan mantad oinsanan nayatan diti nopo oponsol montok papatantu’ waya’ om kotilombuson kopoindalanan palan diti id pototongkop kotinanan. Hal diti okon nopo ko’ moginggirot po do tinonggungan om kopoindalanan osonong id nayatan koupisan, nga nogi’ kapanahak waya’ osonong kumaa tikid kotinanan di kogompit potilombus dino koponuridong koyuon di poinpuli id inggisaman manangod ponuapan.”
Dr. Joachim minoboros, miampai kopoindalanan palan diti, komontirian kokito koinsawaton id kotumbayaan mogigiyon kumaa pomorintaan porinta’, papatantu’ tikid laang om kootuson di onuon nopo nga’ otulid om montok koundaran toinsanan.
“Mantad no dilo’, tadau diti nopo nga’ laang oponsol id koposindakan kokitanan om tonggungan okon nopo ko’ montok Koupisan Ahal Tanak Mamasok Pogun Sabah nga nogi’ montok Komontirian Koporintaan Koiyonon om Pomuwalaian miampai poinpuli,” ka disio.
Nangatan nogi’ disio oinsanan bohogian, lolobi no puru komontirian, montok tumilombus monokodung om gumompit miampai aparagat id kopoindalanan Palan Anti-Ponuapan diti.
“Miampai sokodung ogirot, koposili tokou Komontirian Koporintaan Pomuwalaian om Koiyonon sabaagi ombitanan bobos osonong id kopoindalanan om tinonggungan id Malaysia,” ka disio, i lumansan mooi do buuk Palan Anti-Ponuapan Kotinanan JHEANS montok timpu 2024-2028 i nowonsoi diti aanu popoindalan miampai poinlantoi montok popogoris tonggungan koupisan om mongingkawas kotumbayaan mogigiyon kumaa Kopoindalanan Koporintaan Pogun Sabah.
