Io’ Edward dii Julita (tanga’) miampai puruankuasa’ pinotomod pisokodungan PBS-STAR.
KOTA KINABALU: Puruankuasa’ Pinotomod i nonuan tonggungan montok mamalan skop pisokodungan id pialatan Parti Bersatu Sabah (PBS) om Parti Solidariti Tanah Airku (STAR) pinapaharo mitingan kumoinsan di konihab.
Pinibabarasan karait kumaa papatantu’ suang pisokodungan poingkuro goduduo parti kaanu popouhup kumaa tuduan monginggirot Gabungan Rakyat Sabah (GRS) id koponoguangan Pomilian Agayo Pogun (PRN) Sabah Ko-17.
Monunurat Agayo STAR, Datuk Edward Linggu om Monunurat Agayo PBS, Datuk Julita Majungki id kointalangan diolo’ minoboros, kootusan dilo’ id upa’ Memorandum Pisokodungan goduduo parti pikikiro soinan di goduduo presiden parti dilo’ pogulu Toun Wagu Sina 2024.
Ka diolo’, memorandum pisokodungan dilo’ imuayon do lansanon akawas goduduo parti pogulu soinan.
“Presiden STAR, Datuk Seri Dr. Jeffrey Kitingan om Presiden PBS, Datuk Seri Dr. Maximus Ongkili sumain montok popoimagon memorandum pisokodungan dilo’,” ka diolo.
Sundung pia timpu Koporintaan Pogun maso-maso opupusan wulan Kohopod 2025, nga’ piromutan pihunungan pialatan goduduo parti dilo’ kiguno inggiratan sabab haro tanda-tanda’ PRN17 posopungon kumaa toun 2024.
Boyoon Montiri, Datuk Seri Haji Hajiji Haji Noor soira’ nuhot magaganu habar di ko 13tw Kohopod om Iso’ minoboros do kopikikiraan PRN17 pohoroon osopung 2024 sundung pia timpu Koporintaan Pogun noondo kakal kitimpu kikiro duo toun.
Id pinirubaan di konihab, STAR nobian di Edward, Datuk Flovea Ng (Koonduan), Datuk Jalumin Bayogoh (Kopointalangan), Kong Soon Choi (Komulakan) om i Anuar Ghani.
Naamot PBS nobian di Julita, Datuk Joniston Bangkuai (Kopointalangan), Christopher Mandut (Komulakan), Datin Malianah Ugau (Koonduan) om i Arthur Sen (Timbang Presiden).
