Hajiji (poindikau, tanga’) miampai mongongobi’ 17 kontinjen monongkiala’ id MASISWA Sipoot Zon Sabah 2023.
KOTA KINABALU: Boyoon Montiri, Datuk Seri Haji Hajiji Haji Noor minoboros, RMN474.55 riong maan poobio’ montok kopoburuan ‘modal insan’ do toun tobontol.
“Iti nopo nga’ tingkananon montok ababayan kopoburuan modal insan, wookon dilo’ manahak sikulasip om balajaran,” ka disio.
Hajiji minoboros, Koporintaan Pogun nokopointutun pipiro inggisaman montok monginggaan tonggungan komulakan i mongoput balajaran diolo’ kumaa pinsingilaan akawas, miagal ponguhupan tusin tunui insan-insan montok mamayar yuran porojistoran diolo’ id siriba’ ababayan Ponguhupan Porojistoran IPT (BUDI).
Inggisaman dilo’ minaan onuo’ mantad no do kogunoon om kotundunan susumikul nosili ababayan oponsol Koporintaan Pogun, ka disio id ramai pomupusan Sipoot MASISWA Zon Sabah 2023 id Yayasan Universiti Kolej Sabah (USSF), do hiti di songkosodop.
Hajiji (kolimo, gibang) tinanud di Timbang Canselor UCSF, Dr. Rafiq Idris (kaapat, gibang) pinapatahak trofi bontugan koinsanai kuminaa momuruan kontinjen UCSF.
Hajiji po nogi’ Canselor UCSF minonuhu susumikul kotinanan pinsingilaan akawas swasta om koporintaan do tumilombus monokodung kopoindalanan koburuon pogun maya’ palan Hontolon Sabah Maju Jaya (SMJ).
“Koporintaan pogun momoguno sokodung montok papatantu’ oinsanan ababayan koburuon id palan Hontolon SMJ nakalantoi popoindalan,” ka disio.
Karait kinoburuon kaawagu UCSF, Boyoon Montiri minoboros, kosokodung poinponu’ isio palan univositi dilo’ montok monuridong kampus id labus Kota Kinabalu.
“Sabaagi Canselor UCSF, toririmo ku opoduli’ di kinoburuon balajaran akawas id Sabah om kotinanan pasanganu koporintaan pogun.
“Minaganu oku kopomodulianan kohondot hal osonong i pinahabar di Timbang Canselor, om sabaagi ponusuhut kumaa kooturan Koporintaan Pogun montok poposodia’ kousinan ponolidikan om koburuon, pinoilo oku do Longkod Kajian Kopoburuan USCF masaan popoindalan pipiro ponolidikan.
“Otumbayaan oku di ginoris om ginaras ponolidikan di haro do noondo, UCSF kaanu mongimbulai ponolidikan id mogisuai kaganaan pinsingilaan,” ka disio.
Id kinoburuon suai, Hajiji minoboros, Sipoot MASISWA (Kounsol Sipoot IPTS Malaysia) toi pialatan kotinanan pinsingilaan akawas swasta (IPTS) nopo nga’ koiyonon bobos osonong montok monuridong ‘Altet Kipomusarahan’.
Soginumu’ 1,600 atlet om upisor mantad 17 institusi tuminimung solinaid apat tadau id kampus mananwalai, UCSF montok monongkiala id siam ababayan ponongkialaan.
“Ounsikou oku kokito pisokodungan om kinogompitan IPTS id Sabah. Tilombuso’ pisokodungan om sunduan doun sipoot,” ka disio.
