Dr. Joachim miniboros miampai di Boyoon Montiri Datuk Seri Haji Hajiji Haji Noor pogulu nokotimpuun pitimungan DUN.
KOTA KINABALU: Komontirian Koporintaan Koiyonon om Pomuwalaian (KKTP) id palan koponguludan di inggisaman koponoguangan setinggan i pinosodia’ pogulu diti, ka di Montiri dilo’ Datuk Seri Dr. Joachim Gunsalam.
Ka disio, pipiro mitingan om pinibabarasan i winonsoi do Puruankuasa’ Pinotomod Monoibau kobolingkahangan setinggan om Puruankuasa’ Teknikal.
“Mongiikiro tokou palan koponoguangan di lobi katalang miampai pinoposuang ‘lock figure’, palan karaja’ om ‘timeline’ koponoguangan setinggan maan pohimogono’ om potoguangon montok kolulusan Kabinet Pogun,” ka disio ontok kinopomupusan montok KKTP id pitimungan Walai Undangan Pogun (DUN) do hiti, di tadau baino’.
Minonimbar isio ponguhotan di Aliakbar Gulasan (ADUN Sinili) karait di koponoguangan setinggan i pinosodia’ i haro palan palan timpu anaru om palan timpu oniba’ nga’ aiso’ katatapan setinggan di atalang om timeline.
Kumaa hal pinotoguang di Rina Haji Zainal (Kukusan), ka id Dr. Joachim, oinsanan hal kopohompit do ‘terma’ om kosudongan setinggan id Sabah masaan sorisidon id koposodiaan Palan Koponoguangan Setinggan Pogun Sabah.
Hal Kapaampai Kuut Mamasok Pogun
Dr. Joachim po nogi’ Kumoduo Boyoon Montiri II minoboros, Institut Pingludaan Kuut Mamasok Pogun (ILMAN) masaan doid inggisaman montok popoburu’ om mongingkawas rontob ‘modul’ pingludaan di haro mantad kumaa kopohimogonan om pensijilan tongo’ Luguan Adat om sitaf Kuut Mamasok Pogun (MAN) montok mongingkawas waya’ om komilaan miampai sokodung Borneo Institute for Indigenous Studies (BORIIS).
Ka disio, maya’ pisokodungan diti, ababayan pingludaan di lobi kosonong pointutunan miampai kitimpu kumaa kopongimbulayan silibus pinsingilaan balajaran Diploma Undang-Undang Adat Anak Negeri i kapanahak kosiwatan okon nopo ko’ kumaa moomoguno adat nga nogi’ kumaa tulun ginumuan.
“Karait di karaja’ pointatap id MAN, haro 134 karaja’ di pinolulus id Kuut Mamasok Pogun kapaampai karaja’ Monguhup Upisor Tadbir (N29), Monguhup Tadbir (N22), Monguhup Tadbir (N19), Monguhup Monunurat Upis (N19), Monguhup Operasi (H11) om Monguhup Ginumuan (H11). Montok kopoilaan, wookon mantad karaja’ diti nosuangan, naamot wookon i suai kakal doid karaja’ koposilihan di Bohogian Kikuasa’ Poposili Pogun,” ka disio ontok minonimbar ponguhotan di Datuk Ewon Benedick (Kadamaian).
Karait kogugunaan linimput MAN id tikid watas i pinotoguang di Ewon om i Datuk Dr. Yusof Yacob (Sindumin), Dr. Joachim minoboros, KKTP maya’ Koupisan Hal Tanak Mamasok Pogun Sabah masaan id inggisaman montok papatantu’ tikid watas pasanganu MAN sondiri’ id tikid watas.
Ka disio, gisom babaino’ diti haro turu’ tinan MAN di nopongo minomonsoi om nokoindalan poinponu’ id Sabah i sinakadai id siriba’ Palan Malaysia Ko-11 (RMK11).
“Haro 10 tinan MAN i nokoulud id siriba’ RMK12 miampai ginumu’ kopoobian soginumu’ RM32,343,067 id siriba’ sakadai Koporintaan Pisompuruan om RM6,500,000 id siriba’ sakadai Koporintaan Pogun ilo’ nopo MAN Ranau, MAN Tamparuli, MAN Tongod, MAN Putatan, MAN Sook, MAN Nabawan, MAN Kota Kinabalu, MAN Papar, MAN Paitan om MAN Pagalungan.
“Pipiro tinan kawagu i sinimbuat montok posuangon id palan RMK13 ilo’ nopo MAN Kota Belud, MAN Beluran, MAN Tenom, MAN Kemabong, MAN Kinabatangan, MAN Sipitang, MAN Tawau, MAN Kuala Penyu, MAN Membakut, MAN Semporna, MAN Pitas om MAN Telupid.
“Montok ponuridongan MAN id DUN Sindumin, gisom noondo aiso’ po opalan montok ponuridongan MAN montok DUN Sindumin sabab ponuridongan MAN Sipitang nakaatag no id siriba’ RMK13,” ka disio pinopointalang.
Karait atag di Datuk Hamild Hj Awang (Balung) mooi do MAN Tawau turidongon sabab upis di haro do babaino’ minapus id Linimput MPT solinaid 45 toun om koyuon di okoro’, okikip, aiso’ pisuk pinotomod om sitaf soginumu 13 tulun dilo’ amu’ osimbayanan om haro tana’ nokosodia’ id Jalan Utara Tawau kiginayo 1.13 ekar, Dr. Joachim minoboros, ponuridongan MAN Tawau noowit no montok pinosuang id nuludan projik MAN i pinaatag id siriba’ RMK13.
Komontirian minongilo kinosodiaan koiyonon tana’ di pinaatag montok laang posusuhut, ka disio kawagu.
Naamot atag di Jannie Lasimbang (Kapayan) mooi do insikapan ponuridongan Koupisan Kohokiman Mamasok Pogun montok papabantug MAN, ka di Dr. Joachim pinopointalang do id timpu diti, masaan dilo’ id koposodiaan Karatas Kabinet di Puruankuasa’ Karaja’ id siriba’ Kounsol Hal Tanak Mamasok Pogun Sabah.
“Proses diti kapaampai nogi’ ponuridongan enakmen wagu om ponimbanan enakmen di haro mantad i poinggompit do Kuut Mamasok Pogun Sabah,” ka disio.
Hal koposilihan Luguan Adat
Minonimbar atag koposilihan Luguan Adat di Ewon, Dr. Joachim pinopointalang do mimang momoguno ilo’ do atag koposilihan mantad Mobi’ Rayat id koiyonon dilo’ om kiguno okunan di Upisor Watas pogulu upalai dilo’ romiton om uruson do Koupisan Hal Tanak Mamasok Pogun Sabah.
Karait pomusarahan di Jannie kokomoi koposilihan tongo’ Luguan Adat kiguno pointatap om amu’ mimban-simban, ka disio, katatapan koposilihan tongo’ Luguan Adat do noondo diti kakal tumanud buris puralan di pinosodia’ di toun 2020.
“Montok koponginsonongan, pinatantu’ ontok Mitingan Nuludan Montiri di ko 4tw Kohopod 2023 do aiso’ rontob timpu koposilihan Luguan Adat Pogun Sabah om tumanud di Mobi’ Rayat papatantu’ timpu koposilihan diolo’ gigisom po do gunoon om aanu pupusan tumanud atag Mobi’ Rayat id koiyonon nokomoi; om koposilihan Luguan Adat Pogun Sabah katalib 60 toun om olidas tinan, mositi’ no do maganu kapasagaan mantad Montiri Koporintaan Koiyonon om Pomuwalaian om Mobi’ Rayat di poinggompit,” ak disio.
