Dr. Joachim (tanga’) guminambar pongingitanan miampai di Fredolin, Puru Ngaawi’ Kounsol Takawas PBS, Luguan Komulaakn om oinsanan puru PBS Inanam i minampai ‘Family Day’ i pinaanjur id Padang Kakadayan Menggatal, di konihab.
KOTA KINABALU: Kumoduo Presiden Parti Bersatu Sabah (PBS), Datuk Seri Dr. Joachim Gunsalam otumbayaan PBS om Parti Solidariti Tanah Airku (STAR) kaanu misokodung oronit kosuul no id kopongobian konosipan mogigiyon om potilombus dino popoburu’ Sabah.
Minoboros siio dilo’ ontok minongomi pomusarahan piomungan PBS om STAR ontok minoboros idababayan Tadau Paganakan PBS Bohogian N.18 Inanam i pinaanjur doid Padang Kakadayan Menggatal, do hiti di konihab (ko 26tw Kohopod om Iso’).
PBS om STAR id kointalangan piniiso’ di ko 16tw Kohopod om Iso’ pinopoilo do nokosigampot piupakatan monotk monimpuun pibabarasan pointomod ponuridongan pihunungan om pisokodungan id pialatan goduduo parti.
Dr. Joachim (kotolu, gibang) ruminamit tanda’mato mantad id Albert om poingintong i Fredolin (tanga’) om i William (gibang).
Monunurat Agayo PBS, Datuk Julita Majungki om Monunurat Agayo STAR, Datuk Edward Linggu id kointalangan piniapus dilo’ minoboros, mitingan pinotomod kumoiso’ pohoroon do timpu toruhai diti.
Piupakatan montok monimpuun pibabarasan pinotomod diti nosigampot id pinirubaan pialatan lalansanon goduduo parti di ko 15tw Kohopod om Iso’ 2023 mimpau katatapan posusuhut, ilo’ nopo nga’ montok monumboyo’ kopokionuan nayatan siriba’ i orohian kokito goduduo parti popiromut pisokodungan dilo’ om ogirot monotk pisompuruan mogigiyon orukut tinaru; montok kotilombuson kumaa atag i koowit kumaa inggisaman id sawat pogulu PRN di 2020; om montok monginggirot po do ginaras om sokodung kumaa Gabungan Rakyat Sabah (GRS).
Naamot dilo’, lobi 300 lansanon om puru PBS Bohogian N.18 Inanam minampai Ababayan Tadau paganakan dilo’.
Id boboroson disio, Dr. Joachim i po nogi’ Kumoduo Boyoon Montiri po nogi’ Montiri Koporintaan Koiyonon om Pomuwalaian, minokianu lansanon om puru PBS Inanam tumilombus monginggirot nindikohon parti om papagaras kosompuruan id oinsanan nayatan Lintuhun Undangan Pogun (DUN) Inanam.
Suai dilo’, pinokianu disio oinsanan puru parti do manahak kosokodungan poinponu’ miampai koombolutan id Koporintaan Gabungan Rakyat Sabah – Pakatan Harapan (GRS-PH) Plus.
Naamot dilo’, Luguan Bohogian PBS Inanam po nogi’ Puru Kounsol Akawas (AMT) PBS, Fredolin Totin Bangon minoboros, ababayan Tadau Paganakan diti nopo nga’ iso’ kokitanan i kopokito pisompuruan lalansanon om puru PBS Inanam.
Ka disio, nunu-nunu kobolingkahangan, amu’ pihunungan doid nayatan puru kiguno salasaion miampai sunduan paganakan.
Fredolin pinopolombus pongunsikohan kumaa Dr. Joachim i pinopoimagon ababayan dilo’ om minonongkounsikou nogi’ kumaa ponorikohon manganganjur po nogi’ Luguan Komulakan PBS Inanam, Albert Jumitih nogi’ oinsanan i pinapalantoi dilo’.
Ababayan nopo diti nga’ kumoinsan pohoroo’ om kalansanan koindalan ilo’ do touon potilombus.
Wookon ababayan i ponongkialaan nopo pinisahapan mimbuul koonduan, pisapahan migayat lukug om pialaan momowotik lukisan tanak-anak.
Nokotindapou nogi’ i Monguhup Montiri kumaa Boyoon Montiri po nogi’ Timbang Presiden PBS, Datuk Haji Ruslan Muharam; Monguhup Monunurat PBS po nogi’ Monunurat Pulitik kumaa Dr. Joachim, Datuk Jonnybone Kurum; Luguan Komulakan PBS, Christoper Mandut, Tongo’ Puru Kounsol Takawas parti – Datuk Johnny Mositun, Datuk William Majimbon, Datuk Johnny Goh, Datuk Arthur Sen om John Masabal nogi’ Monunurat Karaja’ PBS, Mesilius Roman om Kumoduo Luguan Bohogian PBS Inanam, Anis Lobinson.
Kapt:
