Tun Juhar (tanga) guminambar miampai di Dr. Joachim, Montiri Komulakan om Sipoot Sabah, Datuk Ellron Angin om tongo’ mamaramit gaa’.
KOTA KINABALU: Koporintaan pogun toririmo tumopot doid kopongonjuran ababayan sipoot id pogun diti, kaampai monokodung koinsanai inggisaman kumaa mongimbulai lobi kogumu’ atlet gisom id nayatan sompomogunan.
Boyoon Montiri, Datuk Seri Hajiji Haji Noor minoboros, kopiongoi di tonggungan dilo’, koporintaan pogun maya’ Komontirian Komulakan om Sipoot (KBS) Sabah tumilombus popoinlipat inggisaman nogi’ popogoris po do tongo’ ababayan kopoburuan sipoot pogun mooi do id sunsuyon di poinhunung, potilombus dino koponsupu’ lobi kogumu’ kalantaion id timpu dumontol.
Tumanud di Hajiji, kopoirntaan pogun pinopoobi’ RM97.5 riong montok kopoburuan komulakan om sipoot, monginsonong kogogonopan sipoot om ponolidisan sains sipoot, montok toun diti, potilombus dino kopokito tonggungan dau kumaa koburuon sipoot om kopoburuan komulakan id pogun diti.
“Orohian tokou kokito Sabah mongimbulai lobi kogumu’ atlet om puru sipoot di abaal i kopogowit bantug sipoot kumaa pogun om pomogunon. Kalansanan ku ga’a om kopongokunan di pinatahak do sodop diti koposingkalab sunduan kumaa di tongo’ tumungkus id nayatan atlet omulok pogun i kikosiwatan montok tilombuson mongintalang montok monurat kalantaion po’ompus i aanu tokou mongondos.
“Agayo kopio kalansanan ku mooi do tongo’ atlet pogun tumilombus minggisom miampai opinogot do maganu lobi kogumu’ midol, lolobi no midol amas, id tikid kopongonjuran sipoot di atanud do timpu dumontol,” ka disio id Ramai Gaa’ Sipoot Pogun Sabah 2021-2022 id Sabah International Convention Centre (SICC) do hiti di kosodop. Teks boboroson disio binasa’ di Kumoduo Boyoon Montiri II po nogi’ Montiri Koporintaan Koiyonon om Pomuwalaian, Datuk Seri Panglima Dr. Joachim Gunsalam.
Ababayan dilo’ notindapou nogi’ di Molohingon Pogun Sabah, Tun Juhar Mahiruddin om Toh Puan Norlidah R.M Jasni.
Hajiji Haji Noor
Pinopoilo nogi’ i Hajiji do koporintaan pogun nakaakun popoinsawat ginumu’ tutungap kinalantaion montok koinsanai kategori i ponongkialaan doid Gaa’ Sipoot Pogun Sabah 2021/2022 Ko-30 diti.
“Kalansanan miampai kinopoingkawasan ginumu’ insentif om tutungkap kinalantaion diti kopongunsub sunduan atlet om tongo’ mimparagat sipoot do tumilombus minggisom monsupu’ kalantaion om naangayan osonong id timpu-timpu do obontol.
“Miagal di noilaan tokou, tomporurul Covid-19 i notoguang do pomogunan kaampai pomogunon diti, nosili titik oitom om nokopomidsala’ ogumu’ siktor kaampai no ababayan doun sipoot. Tomporuruol dilo’ nokoowit kinopotingkodan pipiro pongonjuran ababayan sipoot nayatan kabansaan miagal Sipoot Malaysia, Johor 2020 om pongonjuran topong pomogunan miagal Olimpik Tokyo 2020.
“Pongonjuran Gaa’ Sipoot Pogun Sabah montok toun 2019-2020 nga’ nokotonggoi gisom pongonjuran dilo’ nansansagan minambatal om amu’ naanu minonilombus. Nga’ amu ilo’ nokopomoronok di tongo’ atlet, popotorining om oinsanan mimparagat sipoot pogun montok tumilombus monigampot kalantaion doid sipoot,” ka disio.
Hajiji minoboros, koporintaan pogun poposotol po nogi’ kopoburuan sipoot tulun suai kohimboguian (OKU) toi atlet para id pogun diti, i nokoponsupu’ po nogi’ do kinalantaion gisom id nayatan sompomogunan.
“I nopo lobi kopounsikou sipoot diti nakapanahak asil soira’ Sipoot PARA nakalantoi minonigampot lobi 40 midol amas om nosili bontugan id Para SUKMA doid Kuala Lumpur di toun 2021.
“Naangayan osonong atlet para amu’ nokotingkod do hilo’ nopo, nakalantoi nogi yolo’ pinopo’iliu tolu atlet para pogun diti monongkiala’ id Sipoot Olimpik Tokyo 2020 i pinaanjur di toun 2021.
“Kalansanan ku oinsanan atlet Sipoot Para kotilombus koponsupu’ kalantaion do po’ompus timpu i potuu nayatan kabansaan toi ko’ sompomogunan. Bayahan kumaa oinsanan atlet Sipoot Para,” ka disio.
Id timpu di miagal, mimang nogi’ isio atlet pogun diti nga’ okon nopo ko’ kalantoi id sipoot nga’ nogi’ osonong naangayan doid akademik diolo’.
