Hajiji Haji Noor
KOTA KINABALU: Koporintaan minonuridong Puruankuasa’ Ponguludan Koburuon Mongingindapu’ Pogun Sabah montok monoibau hal pisimbahan pamalanan ababayan pialatan komontirian, koupisan, agensi om kotinanan okon koporintaan (NGO) kopohompit ababayan kopoburuan mongingindapu’ id Sabah.
Boyoon Montiri, Datuk Seri Hajiji Haji Noor minoboros, puruankuasa’ dilo’ ponorikohon miampai di Montiri Kopoburuan Pomorunan om Mongindapu’ Sabah om Montiri Kopoburuan Mongindapu’ om Koperasi Pisompuruan.
Ka disio, puruankuasa’ diti osompuru di pipiro komontirian om agensi koporintaan pogun om Pisompuruan i kitonggungan montok mongulud tongo’ ababayan kousahawanan id pogun diti kaampai no kapanahakan dana.
“Koporintaan pogun nga’ monorisid nogi’ atag om pomusarahan Puur Lintuhun Komulakan Sabah (DBS) montok papaharo Hontolon Kopoburuan Mongindapu’ Sabah id suang timpu 10 toun miampai popohompit koinsanai mongingigit tonggungan,” ka disio id pinomupusan Pitimungan DBS, Mitingan Kumoinsan Penggal Kumoiso’ id linimput Lintuhun Undangan Pogun (DUN) Sabah, do hiti di konihab.
Boyoon Montiri minoboros, koporintaan pogun om komulakan miagal rolou om koongoyon kapaampai Atag Infrastruktur Asas Labus Kakadayan om papatantu’ laang poinpatut anau do komontirian i kitonggungan.
Pinopoilo nogi’ isio do koporintaan pogun maya’ Komontirian Komulakan om Sipoot (KBS) minonuridong soginumu’ 18 Arena Belia id poliliput pogun diti, sabaagi longkod tongo’ komulakan popoindalan mogisuusai ababayan i potuu sipoot toi ababayan sosiol.
Ka disio, oinsanan Puru DBS kiguno papamanau tonggungan popotonu’ do kinoturidongan linimput Arena Belia om momoguno poinggonop kogogonopan di haro.
Minongomi karait kobolingkahangan pangaba’ waig oborisi’ om lotirik id pogun diti, ka di Hajiji, kopoirntaan pogun amu’ kumadaada’, nga’ minaganu laang om inggisaman di kiguno montok manalasai kobolingkahangan dilo’ i notungkusan mantad koporintaan nakatalib.
Karait pomorunan tumau om gas, mimang isio kogompitan tongo’ komponi nokoiyonon Sabah id projik om surupukaraja’ di pouyuhon do PETRONAS kosigampot 30 pihatus do toun tiso’, nung piadangon di kiginumu’ no do 14 pihatus noondo diti.
Lumansan nogi’ isio oinsanan Puru DBS papamanau tonggungan sabaagi mononomboros (spokesperson) id koobian koporintaan pogun doid koporikotan Hontolon Palan Kopoburuan SMJ kumaa tikid nayatan mogigiyon doid poliliput watas sompoopori.
“Iti oponsol sabab kointalangan kokomoi Kopoburuan SMJ 1.0 2021=2025 om tongo’ ababayan mongingkanan oilaan do rayat montok dati’ toinsanan popoburu’ kasasanangan ikonomi, sosiol om pulitik id pogun diti,” ka disio.
Hajiji pinapahabar nogi’ kapatahakan soginumu’ RM2,000 miampai insan-insan (one-off) kumaa koinsanai 79 Puru DBS.
