Dr. Joachim (wanan) minamaramit tandamato mantad di Roslan.
KOTA BELUD: Kumoduo Boyoon Montiri, Datuk Seri Dr. Joachim Gunsalam minongunsub mooi do koinsanai momuruan adat tumilombus kumaraja’ miampai amu’ momuntuk pisuayan pulitik.
“Tilombuson surupukaraja’ osonong kumaa mogigiyon. Kumaraja’ no miampai amu’ momoduli’ pisuayan pomusarahan pulitik,” ka disio.
Minoboros isio dilo’ onotk pinapatahak pason kumaa lobi 100 i nokotindapou kapaamapi do Luguan Watas, tongo’ Luguan Tanak Pogun (KAN), Mongongobi’ Tanak Pogun (WKAN), molohingon kampung om mogigiyon id Ababayan ‘Santai dan Ramah Mesra’ doid Sosondoton View Piasau, Kampung Piasau, do hiti di tadau baino’.
Dr. Joachim po nogi’ Montiri Koporintaan Koiyonon om Pomuwalaian dilo’ monongkounsikou nogi’ kumaa tongo’ momuruan adat i nokopomupus timpu surupukaraja’ diolo’ kamapai no haro i opupusan do toun tiso’.
“Koporintaan pogun monongkounsikou kumaa koinsanai momuruan adat i kuminaraja’ id timpu Koporintaan Gabungan Rakyat sabah (GRS) Plus minomorinta’,” ka disio.
Ka disio kawagu, koporintaan pogun mongunsikou kopio di kouhupan tongo’ momuruan adat om okito iti maya’ kinoingkawason elaun tongo’ momuruan adat mimpuun wulan Kowalu’ toun diti.
Minoboros nogi’ isio, Koporintaan GRS Plus kiharo rikod naangayan di bobos osonong nung piadangon di porinta’ pogulu diti.
Naaomt dilo’, Luguan Watas Kota Belud, Roslan Duraman monongkounsikou kumaa kinasagaan di Dr. Joachim pinoposiwat timpu ruminuba’ di koinsanai momuruan adat id ababayan dilo’.
Ka disio, DUN Kadamaian haro apat KAN, 11 WKAN om 74 molohingon kampung.
