Dr. Joachim (koduo, gibang) ruminuba’ tongo’ mongongobi’ koisaan i nokotindapou id ababayan dilo’.
SANDAKAN: Rontob sukai tobon Sandakan i kilinaid no do 30 toun kiguno intangan kawagu mooi do kopiongoi di kopomogunaan maso-maso mogigiyon watas diti mantad sunduk koburuon om surupukaraja’, ka di Datuk Seri Dr. Joachim Gunsalam.
Kumoduo Boyoon Montiri II po nogi’ Montiri Koporintaan Koiyonon om Pomuwalaian dilo’ minoboros, tohuri nopo rontob sukai tobon watas diti nintangan kawagu nga’ di otun 1994, ilo’ nopo 30 toun di nakatalib, mantad dilo’ norikot no timpu montok rontob sukai dilo’ do intangan koimbagu.
“Nung amu’ intangan kawagu toi poinsawaton rontob sukai tobon diti, Sandakan amu’ koburu’. Nung mimang tokou surupukaraja’ Kounsol Kakadayan Sandakan oingkawasan nga’ momoguno tokou kousinan.
“Nindopuan aanu mantad opuhu sukai tobon diti nga’ gunoon montok mambayar koburuon id Sandakan,” ka disio id Ababayan Kopokinsianan Kopourutan om Pogintongan Kawagu Kopoindalan Pomuhuan Koinsawaton Sukai Tobon 2023 Watas Sandakan i pinaharo id Restoran Kenalanmu do hiti di tadau baino’ miampai sokodung Parti Bersatu Sabah (PBS) Karamunting i binuruan di Luguan Bohogian dilo’, David Fong.
Dr. Joachim (tanga’) minamaramit memorandum kopokinsianan/kagagaan mantad Koisaan-koisaan i nokotindapou doid ababayan dilo’.
Ababayan pinibabarasan i pinoindalan dilo’ notindapou nogi’ di Monunurat Pointatap KKTP, Datuk Dr. Jamil Nais; tongo’ Luguan Bohogian, Luguan Tinimungan Komulakan, Tinimungan Koonduan PBS Zon Limo mongobi’ siam bohogian ilo’ nopo nga’ Karamunting, Sekong, Tanjung Papat, Elopura, Gum-Gum, Sg. Sibuga, Sg. Manila, Lamag om Sukau; tongo’ mongongobi’ mantad Koisaan Mongingindapu’ Tiong Hua Sandakan, Koisaan Gabungan Koisaan Tinaru Sina’ Sandakan om Koisaan Gabungan Sikul Sina’ Sandakan.
Id ababayan dilo’, i Dr. Joachim ruminamit memorandum kopokinsianan/kagagaaan mantad tongo’ koisaan dilo’.
Di konihab i Dr. Joachim pinapaharo pinirubaan miampai di Presiden MPS, Henry Idol i pinopoilo do kinoburuon Rontob Sukai Tobon Sandakan.
Id pinirubaan dilo’ i Henry pinapatahak nogi’ do memorandum kagagaan mantad Koisaan Mongingindapu’ Tionghua Sandakan om parti susumaap montok timbangon ontok papatantu’ rontob sukai MPS i maan poindalano’ do toun tiso’.
Henry pinopoilo do noondo diti oinsanan kagagaan di naramit id timpu kagagaan maan pokinongoho’ id Tribunal Pokinsianan Sukai, pogulu pogibabarasan id Puruankuasa’ Kousinan om pointalantong id Mitingan Poinponu’ Kounsol. Talib dilo’, potilombus dino potoguangon kumaa KKTP montok kootusan tohuri.
Dr. Joachim minoboros, surat ngaawi’ kopokinsianan dilo’ onuan kopomodulianan do komontirian.
“Gisom noondo diti, kopokinsianan diti kakal id nayatan MPS. Indadon tokou gisom bohogian tribunal kopongo mamaramit om mogintong kawagu kagagaan nogi’ koinsanai pitorinaan potilombus dilo’ atanud,” ka disio.
