Dr. Joachim (koonom, gibang) guminambar pongingitanan id konti Sabah fm.
KOTA KINABALU: Ramai Gaa’ Sipoot Pogun Sabah 2021 – 2022 maan pohoroo’ id Longkod Konvensyen Sompomogunan Sabah (SICC) do koompokon wulan Kohopod diti.
Kumoduo Boyoon Montiri Sabah, Datuk Seri Dr. Joachim Gunsalam minoboros ababayan dilo’ poonjuron do Komontirian Komulakan om Sipoot (KBS) Sabah kopihondot pamaramaian kinouliton toun kinosusuon pinotomod ko-70 Molohingon Pogun Sabah, Tun Juhar Mahiruddin.
“Pikiikiro soginumu’ 500 tulun naalap tuminindapou ababayan diti i kapaampai mantad tongo’ atlet pogun, tongo’ luguan koupisan, tongo’ potunud Kounsol Sipoot Pogun, Puru Kotinanan Mongungulud om suai tulun i poingampai miampai mitilombus id sipoot.
“Soginumu’ 15 gaa’ ponongkialaan om pamagatang di toluod do atlet ngaawi’ minomowongi’ ngaran Sabah id kaganaan sipoot.
“Miampai popoiliu pamaga’an diti id iso’ ababayan kopihondot Pamaramaian Kouliton Toun Kinosusuon Pinotomod Ko-70 di Molohingon Pogun (TYT) kapanahak ilo’ ponokotanda’ kumaa tongo’ altet pamagatangan koporintaan pogun di ninggisaman diolo’ solinaid diti,” ka disio ontok pituubungan ‘Kami Bah Ini’ id Studio TV RTM Sabah.
Isio i po nogi’ Ponorikohon Puruankuasa’ Induk karamaian dilo’ lumansan, mantad haro gaa’ di patahakon kopongunsub sunduan tongo’ atlet pogun ngaawi’ mooi do lobi koburu’ do timpu dumontol.
Ka disio, tombului apantang montok ababayan dilo’ nopo nga’ i Tun Juhar om sawo, Toh Puan Norlidah R.M Jasni.
Soginumu’ 14 abbaayan nulud kopihondot pamaramaian kinouliton toun kinosusuon pinotomod ko-70 di Tun Juhar i tinimpuunan di Ababayan ‘Charity Ride TYT Sabah 2023’ pinaanjur Pulis Kontinjen Sabah di ko 22 gisom ko 23tw Koturu’ katatalib.
