Hajiji pinopowonsoi gimik kopoimpuunan projik id koiyonon projik Loji Pongubatan Waig Kogopon Fasa II di tadau baino’.
PAPAR: Boyoon Montiri, Datuk Seri Hajiji Haji Noor minoboros, Wokok Hidroelektrik kigatang RM4 bilion maan wonsoiyo’ id Ulu Padas, Tenom montok kapanalasaian timpu anaru kumaa kokurion waig id Sabah.
Maan poimpuuno’ do tulan Kohopod diti, minoboros isio, wokok i pikikiro opongo do 2027 dilo’ kapangaba’ 6,000 riong liter sangadau (MLD).
“Ilo’ nopo nga’ projik pisokodungan Koporintaan Pogun maya’ Sabah Energy Corporation om siktor swasta,” ka disio katalib pinopoimpuun projik Loji Pongubatan Waig Kogopon Fasa II do hiti id baino’.
Boyoon Montiri minoboros, Koporintaan Pogun nga’ masaan nogi’ popoindalan ponorisidan koonuanpoindalanan Wokok Papar toi Kaiduan sabaagi iso’ po panalasaian timpu anarau kumaa kobolingkahangan kokurian waig om montok manampung gunoon mangangapu’.
Karait kobolingkahangan pangaba’ waig id Tuaran gisom Univositi Malaysia Sabah (UMS), Boyoon Montiri minoboros, pikikiro dilo’ aanu monoibau do koompokon toun diti soira’ nopo kobolingkahangan i potoguang do projik Loji Pongubatan Waig Telipong osoibahan.
Hajiji minanahak jominan do Koporintaan Pogun masaan minggisom montok monoibau kobolingkahangan waig kaampai id Sandakan, Tawau om Lahad Datu.
Daamot dilo’, Loji Pongubatan Waig Kogopon i koindalan karaja’ kopoburuan RM379 riong id siriba’ kopoburuan Fasa II montok monginggumu’ ginumu’ kopolobusan kumaa 80MLD i kapanahak koundaran kumaa kikiro 160,000 moomoguno id Putatan, Kinarut, Lok Kawi om pososorili’ dilo’.
Minoboros isio, projik dilo’ kopomoruhang kopulion pangaba’ waig montok manampung kopokionuan pomorunan, kosuul no Terminal Tumau om Gas Sabah (SOGT) om Presint Agro-Industri Sabah (SAIP) id siriba’ Koridor Kopoburuan Sabah gisom 2040.
“Ilo’ kouhup monoibau kokurian waig id koributan Tisan Kotonobon,” ka disio.
Hajiji minonuhu’ Koupisan Waig miontong poinpidot komogoton projik dilo’ montok papatantu’ aanu ilo’ do momongo tumanud timpu tolu toun manatad baino’.
“Amu’ oku mimang kokito projik dilo’ oundorongan om rayat tohuri nopo nga’ ooliman do pangaba’ waig,” ka disio.
Pogulu, Boyoon Montiri nonuan kopointalangan do Loji Pongubatan Waig Kogopon do noondo diti kiharo ginumu’ kopolobusan soginumu’ 40MLD om projik monginsonong dilo’ kopomoruhang kopolobusan do 40MLD po.
Wookon skop projik nopo nga’ kapamansaian loji pongubatan wagu (kikapasiti 40MLD), ponimungan pangadas 10 riong liter, tolu tangki kopoikidan id Kimanis, Kampung Nagapas (Papar) om Kampung Ketiau (Putatan) om monginsonong rontob kopongonuan waig.
Nokotindapou nogi’ i Kumoduo Boyoon Montiri III po nogi’ Montiri Karaja’ Agayo, Datuk Ir. Shahelmey Yahya, Montiri id Koupisan Luguan Montiri, Datuk Armizan Mohd. Ali, Monguhup Montiri Karaja’ Agayo, Datuk Limus Jury om Datuk Robert Tawik, ADUN Kawang, Datuk Ghulam Haidar Khan Bahadar, ADUN Limbahau, Datuk Juil Nuatim, Monunurat Pointatap Komontirian Karaja Agayo, Datuk Ridhwan Roger Linus om Potunud Koupisan Waig Sabah, Suhaimi Asbullah.
