Timpu pirurumaan sanjaam di Armizan om puru SMAN Toh Puan Hajah Rahmah.
PAPAR: Sabah karamit do 114 upisor teknikal miampai tolu tulun montok tikid watas id timpu toruhai.
Montiri id Koupisan Luguan Montiri (Hal Sabah, Sarawak om Karaja’ Ngaawi’ Pinotomod), Armizan Mohd Ali minoboros ilo’ nopo nga’ nosusuhut di ‘devolution of authority’ toi kinopolintuhunan kuasa montok koupisan teknikal id siriba’ ‘Arahan 182’ i pinolulus di Luguan Montiri kumaa Sabah om Sarawak.
“Koporintaan Pisompuruan masaan minggisom montok papatantu’ dati’ kaanu popoburu’ ikonomi tokou om moningkanan kumaa kopoindalanan tongo’ projik kopoburuan do osikap.
“Iti sabab no laang dilo’ kapasarok ikonomi pomogunon okon ko’ id nayatan Pisompuruan nopo nga’ nogi gisom kumaa nayatan siriba’ kaampai no nayatan watas.
“Kohondot dilo’, monongkounsikou tokou kumaa di Luguan Montiri i pinopolulus kinopokionuan Sabah om Sarawak miampai minanahak devolution of authority toi kopolintuhunan kuasa’ montok koupisan teknikal id siriba’ Arahan 182.
“Koupisan Teknikal do noondo kapaampai do Koupisan Karaja’ Agayo (JKR) om Koupisan Pomuwoligan om Poluluyungan (JPPS) do babaino’ kaanu popoindalan tongo’ projik kopoburuan id siriba RM50 riong,” ka disio pinopointalang.
Armizan i po nogi’ Puru Parlimen pinapabanta’, pomoruhangan ginumu’ upisor teknikal dilo’ kalansanan koponguhup tongo’ upis watas do popoindalan projik ngaawi’ kopoburuan okoro’ miampai osikap.
“Koporintaan minanahak ‘empowerment’ kumaa tongo’ upis okoro’ om Bohogian Kikuasa’ Nokoiyonon (PBT) hinombo do projik ngaawi’ koporintaan maya’ ICU, KKDW om sopiagal dilo’ komontirian ikonomi nga’ aanu popoindalan mitilombus do Upis Watas.
“Kobolingkahangan i potoguang nopo nga’ kohimpogongan ginaras, kogoosan tongo’ upisor watas i kiharo upisor teknikal di okuri… haro duo haro songulun.
“Miampai koposilihan upisor teknikal dilo’, projik ngaawi’ kopoburuan pisompuruan i pogulu diti poindalanon do kotinanan pisompuruan do babaino’ aanu poindalanon do JKR om JPPS,” ka disio kuminaa media katalib pinopoimagon Ababayan Bicara Merdeka Kopihondot Tadau Kabansaan id Sikul Mananga’ Ugama’ Pogun (SMAN) Toh Puan Hajah Rahmah, di tadau Koiso’.
Id ababayan dilo’, i Armizan monongkirumo solinaid sanjaam miampai tongo’ susumikul montok poposindak do ‘paradigma’ sukod wagu id inggisaman mamarati kinomordikaan.
“Amu’ tokou mimang tongo’ sukod wagu amu’ karati di kinoinggoritan, kinolubukan nogi’ i pinowonsoi di tongo’ mononogulu tinaru i mininggisom minaganu kinomordikaan.
“Kiangkab tokou nogi’ do mogowit tangaanak diti do poposindak paradigma diolo’ mintong kinomordikaan okon nopo ko’ monotk maganu om monuang dilo’, nga’ mogowit diolo’ do manahak pomurotian kinomordikaan dilo’ mooi do gatang di lobi kagayo id kopogiagalan tokou id koyuon ikonomi Madani.
Minonimbar koyuon ralan sumuang kumaa sikul dilo’ i nadalaan naraag gama-gama’ kinapamawaalan walai mimpoopori i nokotonu’ di kaawagu diti, i Armizan pinopoilo do bohogian disio mogintong koyuon ralan dilo’ pogulu popotoguang poruntukan mantad kotinanan di poinggompit.
Suai ko ilo’, pinapahabar nogi’ isio do kopoudangan sumbu solar id po’ompus ralan sumuang montok kogogonopan mogigiyon om puru sikul dilo’.
