SANDAKAN: Boyoon Montiri (KM), Datuk Seri Hajiji Haji Noor minoboros, angkab montok kotoronongon mositi’ padarapason timpu sabab pisangadan om kokusutan amu’ koowit nunu-nunu suai ko’ koumpadanon.
“Kanou tokou no momusorou poinralom karait kotoronongon om sangod nogi’ kokusutan amu’ popowonsoi nunu-nunu suai ko’ kopunsohon. Goduduo dilo’ amu’ kasaga’ do aantakan,” ka disio kawagu.
Minoboros kopihondot Tadau Kahandaman Sandakan i pinaharo id Taman Memorial do hiti di tadau baino’, Boyoon Montiri minoboros, Sabah momuhondom kinobulunon soujor misompuru (bersekutu) i suminangod id Sangod Pomogunan II.
Hajiji Haji Noor
“Toririmo dahai monongkouniskou om toririmo dahai momuhondom diolo’ mantad kinolubukan om kouhupan diolo’ montok minanamong kotoronongon walai dahai,” ka disio. Boboroson disio binasa’ di Monguhup Montiri Ponombuluyan, Koubasanan om Sandad Posorili’, Datuk Joniston Bangkuai.
Tadau diti ponokotanda’ Kouliton Toun ko-78 kinopupuson sangod di toun 1945. Kinatagakon soujor bersekutu i abarani potilombus poimpasi id pomusarahan puru paganakan.
“Kosuabon diti, kanou tokou no momusorou toruhai kinolubukan diolo’.
“Id timpu dati momuhondol tulun ngaawi’ ongkobulun i alaid no koidu’, mamagatang tokou nogi’ mogigiyon nokoiyonon i pinapabanta’ om kinatagakon niawa minonguhup soujor bersekutu. Kanou tokou no mamantang diolo’ om tulun di suai sabaagi ‘wira’,” ka di Hajiji.
Boyoon montiri minoboros, ababayan momuhondom tadau diti i pohoroon tikid toun nga’ koporonit nogi’ do Australia, Britain om Sabah.
“Sabah om kosuul no, Sandakan toririmo mamaramit dokoyu om paganakan dokou. Iti kosili koiyonon kahandamanan dokoyu,” ka disio.
Minongunsikou nogi’ isio inggisaman Kounsol Kakadayan Sandakan, Kotinanan Ponombuluyan Sabah om puruankuasa’ manganganjur mantad tonggungan po’ompus diolo’ do mamantang diolo’ i nokolubuk om pinopoopi’ sinusuyan diolo’.
“Oponsol kopio montok dati’, nogi’ tangaanak dati’, do posorohon di bohogian sinusuyan kahandaman diti mooi do koilo nunu i natagak om kinosimbayanan di naanu sabaagi somuli’ dilo’,” ka disio.
Hajiji minonongkounsikou nogi’ kumaa Suruhanjaya Takawas Australia om British id Malaysia mantad sokodung po’ompus diolo’ do papatantu’ sinusuyan kahandaman diti poinsorou om ahandaman toinsanan.
Joniston guminambar miampai Pesuruhjaya Takawas British om Australia kumaa Malaysia om tulun kingangaran katalib ababayan dilo’.
