Hajiji (koduo, gibang) pinopoungkayut konvoi Kembara Medeka id Tuaran di tadau baino’.
TUARAN: Kimpin Wulan Kabansaan om Popokili Jalur Gemilang nopo nga’ timpu bobos osonong montok momuginawo sunduan kopongupusan pogun (patriotisme) om poluhub pisompuruan id nayatan rayat orukut tinaru om ugama’, ka di Boyoon Montiri (KM), Datuk Seri Hajiji Haji Noor.
Minoboros id ababayan Merdeka Jalur Gemilang doid Astaka Padang Tuaran do hiti di tadau baino’, ka disio, uhu Tadau Kabansaan toun diti “Malaysia Madani: Tekad Perpaduan Penuhi Harapan” nopo nga’ kosudong kopio sabab pisompuruan tinaru om pogititimbangan nosili rukod id kopotimporonan kinopomorintaan sondiri’ (kinomordikaan) pogun.
Ka di Hajiji, id pomogunon i orurukut miagal do Malaysia, pisompuruan id pogialatan tinaru om sinakagon mositi’ tilombuson poluhub om umoligan sabab ilo’ no i isoiso’ no ralan montok monigampot kosunion ikonomi di koburu’ om kaadangon pulitik.
“Pokionuon ku rayat do misompuru om misokodung montok mongumolig om monginggirot pisompuruan id pomogunon tokou. Nosili tonggungan tikid rayat montok papatantu’ koburuon om komogoton kotilombus opurimanan om amu’ oumpadanan di hal ngaawi’ tangaraat,” ka disio.
Ingkaa nogi’, ka disio, inggisaman Koporintaan Pogun id koponigampotan koburuon di pinalan id siriba’ Hontolon Sabah Maju Jaya momoguno sokodung ogirot mantad oinsanan.
“Id sunduk diti, piromutan ogirot, pirotian, pogitimbangna om pisompuruan id nayatan rayat doid koinsanai nayatan nopo nga’ agayo id kopotontuan kalantaion koburuon id Sabah,” ka disio.
Kopiongoi do Wulan Kabansaan, Boyoon Montiri minongunsub nogi’ rayat do maganu inggisaman popokili Jalur Gemilang miampai poinponu’ koondosan om mongolon bondira’ di naraag.
“Kanou tokou no toinsanan poposuni kopurimanan opoduli’ id nayatan mogigiyon mooi do akawas pogigintong om mamantang yolo’ Jalur Gemilang sabaagi kokitanan om kointutunan tinaru diti,” ka disio.
Nokotindapou nogi’ i Montiri Koburuon Labus Kakadayan om ADUN Tamparuli, Datuk Jahid Jahim; Monguhup Montiri Ponombuluyan, Koubasanan om Sandad Posorili’ om ADUN Kiulu, Datuk Joniston Bangkuai; Ponorikohon Eksekutif Innoprise Corporation Sdn. Bhd. om ADUN Pantai Dalit, Datuk Jasnih Daya; Ponorikohon SESB om Puru Parlimen Tuaran, Datuk Wilfred Madius Tandau; Upisor Watas Tuaran, Hadzlan Jablee; Potunud Kopointalangan Pogun, Jenisah Mohd. Noor om tongo’ lansanon mogigiyon.
Boyoon Montiri do talib dilo’ pinopoungkayut Konvoi 17 padsakaian mantad walu’ kotinanan koporintaan om swasta i kapaampai 66 tutumanud. Tuaran nobian 10 tutumanud kapaampai 25 padsakaian i pinaangayan doid Kiulu, Tamparuli om potilombus dino kumaa Kudat.
Konvoi Kembara Merdeka onjuran Koupisan Kopointalangan Pogun dilo’ mamanau kisinodu’ 2,300 km id poliliput Sabah gisom ko 31tw Kowalu’ diti.
