Ewon guminambar pongingitanan miampai tongo’ talap id Ababayan Jom XCESS SME Bank Longkod Watas Sabah id Pasifir Sutera Harbour, do hiti, di tadau baino’.
KOTA KINABALU: Montiri Koburuon Mongungusaha’ om Koperasi, Datuk Ewon Benedick minoboros, SME Bank iso’ mantad kotinanan id siriba’ komontirian dilo’ pinapatahak ponguhupan lobi RM500 riong kumaa 727 mongungusaha’ id Sabah.
Minoboros isio, gisom tulan Ko’onom toun diti nopo soginumu’ RM48 riong gatang pinonguhupan i nakatahak kumaa tongo’ mongungusaha’ om toun nakatlaib RM168 riong.
“Iti iso’ ginumu’ di kounsub kopio om kalansanan ku miampai haro ababayan po’ompus miagal diti, SME Bank kapanahak ponguhupan toi surupukaraja’ kumaa lobi kogumu’ mongungusaha’ Perusahaan Mikro Okoro’ om Gonsuhatan (PMKS) id Sabah.
“Wookon siktor ponoruntud osuul siktor pongindopuan i nointutunan do SME Bank montok watas Sabah nopo nga’ pomorunan pamansaian, ponuridongan om ponombuluyan montok monguhup koporintaan pogun popoburu’ mongungusaha’ id pogun diti,” ka disio id kapahabaran katalib pinopoimagon Ababayan Jom XCESS SME Bank Longkod Watas Sabah, id Pasific Sutera Hotel, do hiti, di tadau baino’.
Nokotindapou nogi’ Kumoduo Monunurat Bohogian Kopoburuan Francais om Vendor, Komontirian Kopoburuan Mongungusaha’ om Koperasi, Datin Azira Othman, Presiden Tinimungan / Luguan Upisor Eksekutif SME Bank, Datuk Wira (Dr.) Aria Putera Ismail, Luguan Upisor Strategi Korporat Tinimungan SME Bank, Datuk Dr. Mohammad Hardee Ibrahim, Luguan Upisor Pongindopuan SME Bank, Zabidi Abdullah om i Monguhup Totuo Ko-kurikulum Sikul Kabansaan Pekan Pensiangan Komprehensif 9, Aloysius Robert.
Nokopogulu ontok minoboros, ka id Ewon, kopoburuan PMKS momoguno sokodung oinsanan bohogian kaampai tongo’ kotinanan komontirian miagal do SME Bank.
Otumbayaan isio, mantad haro sokodung do SME Bank koponguhup po ilo’ mongingkawas toluod mongungushaa’ PMKS kumaa koburuon ikonomi pogun Sabah o kosuul no om pomogunon miampai poinpuli.
Ewon minoboros, Komontirian Kopoburuan Mongungusaha’ om Koperasi (KUSKOP) aparagat mindahu’ montok minsomok tinimungan mongungusaha’ pomogunon.
“Wookon inggisaman kaawagu di pinaharo nopo nga’ Minggu’ Usahawan Negara 2023, Minggu PMKS om kinopoimpuunan Pelan Pemformalan Usahawan Informal.
“Suai mantad dilo’, Ababayan Jelajah Keusahawanan Bersasar (JKEB) nga’ pinaharo miampai momorikot di kapagarasan mongungusaha’ koonduan, tulun sandad om bagas nokojiil. Ababayan diti manahak kosiwatan kumaa diolo’ gumompit id kaganaan kousahawanan,” ka disio.
Minoboros isio, inggisaman i pinoindalan do KUSKOP nopo nga’ wookon inggisaman papatantu’ angkab ‘Dasar Keusahawanan Nasional 2030 (DKN2030) poposili Malayisa songinan pomogunon kousahawanan abantug om kopotonggoi ngaawi’ dumontol 2030 aanu monigampot.
“KUSKOP nga’ pinoposodia’ mongisusuai kousinan kopoinsanang montok tuduan pongingkawasan ginaras mongungusaha’ om koperasi pomogunon. Maya’ SME Bank, kousinan poobion kigatang RM20 riong pinosodia’ montok Skim Ponguhupan Buburuon Sosial kituduan popoburu’ om monginggirot buburuon sosial.
“KUSKOP nga’ pinoposodia’ nogi’ kousinan koinsanai kigatang RM11.5 riong kosuul montok CEDAR popoindalan apat ababayan kopoburuan ginaras kousahawanan montok toun diti,” ka disio.
Mantad dilo’, nunsub disio mongungusaha’ id pogun diti monongkiahou kosiwatan di haro montok papatantu’ mongungusaha’ mamasok id Sabah koponoluod kumaa naangayan 45 pihatus toluod PMKS kumaa Kolobusan Suang Pomogunon Kasar (KDNK) dumontol toun 2025.