Hajiji Haji Noor
KOTA KINABALU: Koporintaan Pogun agayo ginawo di kinopoimpuunan Longkod Timbang Tara om Pengantaraan Sompomogunan Borneo (BICAM) id inggisaman monigampot naangayan osonong id surupukaraja abaal om popointutun panalasaian pigogutan sumpili’ (ADR) id watas Borneo.
Boyoon Montiri, Datuk Seri Hajiji Haji Noor minoboros, maya’ ababayan pintoriningan, balajaran om kopoburuan abaal, abaal koundangan nokoiyonon oinggonopan do kakamot di gunoon montok ‘cemerlang’ id kaganaan ADR, potilombus dino kopoinggirot Pogun-Pogun Borneo sabaagi rikoton osuul surupukaraja’ undang-undang id ponongkoiyonon diti.
“Ounsikou ginawo ku nokoilo do BICAM kiharo tuduan montok popo’iliu dau sabaagi ‘hab’ nabantug montok timbang tara sompomogunan om pengantaraan, okon nopo ko’ id ponongkoiyonon Borneo nga nogi’ id watas Nusantara om BIMP-EAGA di lobi poinpuli.
“Ponuridongan BICAM kopokito tonggungan tokou montok posuni koyuyuon di osimbayan montok manalasai pigogutan komersial miampai opulokis om gatang di kosudong,” ka disio id ababayan kinopoimpuunan BICAM doid Longkod Konvensyen Sompomogunan Sabah (SICC) do hiti di tadau baino’. Boboroson disio binasa’ di Kumoduo Boyoon Montiri I / Montiri Pomutanaman, Ponginsadaan om Pomorunan Takanon, Datuk Seri Dr. Jeffrey Kitingan.
“Manahak oku jominan do Koporintaan Pogun Sabah, maya’ Komontirian, Koupisan om Komponi Poinggompit Koporintaan (GLC), monokodung inggisaman BICAM.
“Miampai popogompit penimbang tara om pengantara nokoiyonon om sompomogunan, koponuridong tokou panel abaal i mogisusuai om komilaan, mongingkawas po do tinonggungan om waya’ do longkod diti, sabab no do kounsol om mononorina’ BICAM kapaampai mantad luguan abaal id poliliput koiyonon diti, om kapatantu’ piilangan ‘visi’ om surupukaraja’ di kiwaya’ montok kopoindalanan longkod diti,” ka disio.
Hajiji minoboros, BICAM nopo nga’ kokitanan tonggungan pgoun kohondot di kopoburuan ‘modal insan’, komponen osuul palan rikoton kopoburuan pogun, Hontolon Sabah Maju Jaya (SMJ).
“Mantad monuridong longkod ‘kecemerlangan’, kopomorikot tokou do popoburu’ modal insan di kaanu monokitopong, kikomilaan om kinaangayan akawas id ponong koiyonon diti,” ka disio.
Hajiji nga’ minongunsub nogi’ do BICAM montok momit naangayan kotinanan nointutunan miagal do Longkod Timbang Tara Sompomogunan Singapura (SIAC) om Longkod Timbang Tara Sompomogunan Hong Kong (HKIAC), i susuyan kinalantaion dilo’ nokoimbayat kopoopuan mitilombus mantad labus di agayo.
“Mantad ponuridongan BICAM, Sabah mongiikiro waya’ dilo’, hinombo do kopoburuan longkod diti kounsub kosunion id mogisusuai pomorunan. Mantad no do popo’iliu tooku do Sabah sabaagi hab surupukaraja’ montok ADR om perbankan, mominsorou tokou do ‘ekosistem’ di koburu’ i monokodung luyar, penimbang tara om pengantara, kopongimbulai kosiwatan pakarjaan i kapasarok koburuon ikonomi om mogigiyon tokou.
“Mogisusuai inggisaman ponuridongan ‘kapasiti’ id pamalanan nogi’ kitonggungan sabaagi pongunsuban montok papagaras mogigiyon tokou kumaa kogiroton tinan om piromutan di lobi kagayo kumaa kosiwatan ‘global’,” ka disio.
Minamarayou nogi’ isio inggisaman Ponorikohon BICAM Tan Sri David Wong, i pinapapanau tonggungan oponsol id koposiahan om monokodung ponuridongan longkod dilo’.
