Juliah tinanud di Datin Seri Cicilia Edwin nogi’ puru MUTIARA GRS minooi intong sulap pokikitanan id Ababayan Jerayawara Kasih Keluarga Madani: Keluarga@Kerja Watas Lintuhun Undangan Pogun N.39 Tambunan kopihondot Pamaramaian Tadau Molohing Nayatan Pogun Sabah 2023 & Kimpin Kopurimanan Bato Reproduktif Tondu (WCaRe) id Lintuhunj Poingukab Pisompuruan Square, Tambunan di tadau baino’.
TAMBUNAN: Ababayan ‘Jerayawara Kasih Keluarga Madani: Keluarga@Kerja’ nopo nga’ wookon inggisaman koporintaan montok monguhup koonduan mooi do lobi opoduli’ kumaa panamangan kolidasan tinan, suai ko’ id sunduk kotinanan paganakan, ka di sawo Boyoon Montiri, Datin Seri Juliah Salag.
Ka disio, ababayan dilo’ do toun diti nopo nga’ kinotilombuson di kinapamanahan kolimo soira’ nokoimpuun id Sulaman, Tuaran di ko 3tw Kotolu 2022, montok minsomok tinimungan tingkananon id poliliput watas Lintuhun Undangan Pogun (DUN) id Sabah.
Minoboros isio, Ababayan Jerayawar dilo’ tumongkop kumaa poliliput pogun tumanud kinoiyonon DUN di pinili’ montok manahak koundaran kumaa rayat id pogun diti do moningkanan kopoburuan om kopoinggirotan kotinanan paganakan nogi’ mongingkawas koilaan karait kolidasan ‘reproduktif’ koonduan.
“Do toun diti, ababayan diti pinoindalan miindad di kimpin kopurimanan bato reproduktif tondu’ (WCaRe) i poindalanon do bohogian Kotinanan Mogigiyon om Koburuon Paganakan Pogun (LPPKN).
“LPPKN Sabah pinopiromut pisokodungan di ogirot kopio miampai Kotinanan Muafakat Titipan Amal Isteri Wakil Rakyat, Gabungan Rakyat Sabah (MUTIARA GRS) montok popoinggayo po do surupukaraja’ doun paganakan om kolidasan reproduktif kumaa pototongkop Sabah maya’ pongonjuran ababayan diti,” ka disio.
Minoboros isio dilo’ ontok pinopoimagon Ababayan Jerayawara Kasih Keluarga Madani: Keluarga@Kerja montok DUN N39 Tambunan kopihondot Pamaramaian Tadau Molohing om Kimpin Kopurimanan Bato Reproduktif Tondu (WCaRe) Nayatan Pogun Toun 2023 id Lintuhun Poingukab Pisompuruan Square, do hiti di tadau baino’.
Juliah i po nogi’ Molohingon MUTIARA GRS minoboros, ababayan dilo’ nga’ kosili nogi’ koiyonon kumaa bohogian poinggompit kosuul no LPPKN do mongilo miampai poingoros kobolingkahangan toi i pokigugunoon mogigiyon id nayatan guas, kosuul no tinimungan koonduan labus kakadayan.
Tumanud disio, mogisusuai surupukaraja’ pinosodia’ id ababayan dilo’, kaampai no ababayan ponudukan doun paganakan, Surupukaraja’ Paganakan Manau-Panau (PKB) LPPKN montok manahak kotorinaan ponontudukan klinikal, pomorisaan kolidasan, om koporojistoran poniisan ‘mamogram’ do aiso’ kabayar kumaa koonduan i kosudong tumanud kotontuan di nakatatap.
Ka disio, kopoindalanan Ababayan Jerayawara Kasih Keluarga Madani nopo nga’ kosiwatan bobos osonong kumaa tongo’ tutumanud do maganu koundaran maya’ piilangan i patahakon di tongo’ upisor i kikabaahan id sunduk hal paganakan om kolidasan.
“Kalansananku lobi kogumu’ koonduan kosuul no tongo’ tina’, sawo id walai toi ko’ i songingkaraja’ do poposiwat timpu rumikot id ababayan i kikoundaran kopio diti, om miampai mongumolig, momusus om papagaras paganakan sabaagi kolid om posunduran kaadangon sosial,” ka disio pinoposotol.
