Hajiji om Nik Nazmi (gibang) minonorikohon mitingan id Menara Kinabalu, Kota Kinabalu, di tadau baino’.
KOTA KINABALU: Pitimungan pinotomod Lintuhun Undangan Pogun (DUN) Sabah pinatantu’ do ko 3tw Koiso’ toun tiso’ montok mongukab ralan kumaa Sabah monowoli kapanamangan pangaba’ lotirik pogun.
Boyoon Montiri, Datuk Seri Hajiji Haji Noor minoboros, Luguan Montiri, nakapanahak do ‘sikonol’ kumaa Sabah montok monowoli kapanamangan pangaba’ lotirik dau do ko 1tw Koiso’, 2024.
Montok monumboyo’ di timpu nakatantu’, koponguludan om pisokodungan mantad oinsanan nopo nga’ oponsol mooi do koinsanai hal, kosuul no id koundangan aanu manalasai, ka dsio id mitingan puruankuasa’ pemandu kapatahakan kapanamangan pangaba’ lotirik kumaa Sabah.
Mitingan dilo’ pinonorokohon dio’ Boyoon Montiri om Montiri Intodonon Sandad, Sandad Posorili’ om Kosimbanon Iklim Nik Nazmi Nik Ahmad id Menara Kinabalu, do hiti di tadau baino’.
Wookon laang i gunoon nopo nga’ kolulusan mantad Kabinet Pisompuruan montok mongupalai om popoimagon Perkara 95C Koundangan Pisompuruan montok popogiwis Akta Pangaba’ Lotirik 1990 (Akta 448), Akta Ginoris Aanu Monginwagu 2011 (Akta 725) om Akta Bohogian Kikuasa’ Kopoburuan Ginoris Lestari 2011 (Akta 726) id Sabah.
Hajiji miampai di Nik Nazmi pogulu mitingan nokoimpuun id Menara Kinabalu, Kota Kinabalu di tadau baino’.
“Potilombus dilo’, kasagaan Seri Paduka Baginda Yang di-Pertuan Agong gunoon om kiguno tonudon miampai Porinta’ Awam id Parlimen i aanu pawaladon katalib kopogiwisan dilo’,” ka disio.
Id boohogian Koporintaan Pogun, duo rang undang-undang kokomoi Enakmen Pangaba’ Lotirik om Enakmen Ginoris Aanu Monginwagu, nogi’ ponimbanan kumaa Enakmen Suruhanjaya Ginoris Sabah 2023 (montok poposuang kogunoon kapanamangan pangaba’ lotirik om ginoris aanu moginwagu), maan pawalado’ ontok pitimungan pinotomod DUN Sabah do ko 3tw Koiso’ toun tiso.
“Momoguno tokou kookunan mantad komontirian om kotinanan poinggompit i potuu id nayatan Pisompuruan om Pogun mooi do oinsanan kopoindalanan diti aanu popowonsoi miampai oturundus lolobi no id sunduk kotopoton om mongilag pamagangahan kumaa kopoindalanan pangaba’ lotirik id Sabah,” ka disio.
Talib dilo’, io’ Hajiji dii Nik Nazmi minonorikohon mitingan Puruankuasa’ Pamalanan om Kopoindalanan Kapangabaan Lotirik om Tarif (JPPPET) Sabah, hinombo do Palan Kopotundaan Penjanaan Sabah (2023-2027) pinolulus.
Pinatantu’ do Suruhanjaya Ginoris Sabah (ECoS), Palan Kopotundaan Penjanaan Sabah kituduan poposodia’ panalasaian osikap kumaa kokurion ginumu’ kopongimbulayan ginoris di kadala’ doid Sabah do noondo.
Nokopogulu, ka di Hajiji, id kopongikiraan kapatahakan panamangan pangaba’ lotirik kumaa Sabah, Koporintaan Pisompuruan unsubon popoinsanang om monilombus karalanon montok papatantu’ projik di pinalan id siriba’ Palan Kopotundaan Penjanaan Sabah opongo tumanud timpu.
Minoboros isio, iti kaampai no laang otimpas montok mongingkawas pangaba’ lotirik id Tisan Kosilahon, i kopononduli’ osikap ‘marfin rizan’ lotirik Sabah kumaa sokukuri’ do 30 pihatus dumontol wulan Kosiam toun diti.
Hajiji (wanan) miniboros miampai di Nik Nazmi pogulu nokotimpuun mitingan.
“Iti koposodia’ panalasaian osikap kumaa kokurion kogonopan adalaan id Sabah, potilombus dino kopokito tonggungan koporintaan pogun om Pisompuruan montok manalasai kobolingkahangan dilo’ do poinpuli om kiwaya’,” ka disio.
Suai ko ilo’, mitingan dilo’ pinapatantu’ monotk momoruhang ginumu’ kopolobusan lotirik id Tisan Kotonobon momoguno pangaba’ gas sandad di poinharo mantad nogi’ projik kopongimbulaian pomoruhang suai id poliliput Sabah.
“Koporintaan Pogun kopuriman do koponsolon mongingkawas pomogunaan ginoris aanu monginwagu montok monokodung inggisaman ‘karbon neutral’ pogun om kosiwatan akawas ginoris solar id Sabah. Mantad dilo’, koporintaan pogun mongingkawas kopolobusan ginoris Solar Kitukuran Agayo kumaa 100MW do 2026 id Tisan Kosilahon,” ka disio.
Hajiji minoboros, sabab no do kosiwatan ‘hidroelektrik’ montok mongingkawas ginumu’ ginoris aanu monginwagu, koporintaan pogun, maya’ ECoS, popoindalan ponorisidan montok mamalan Palan Induk Kopoburuan Hidroelektrik Sabah mimpuun toun diti.
Hinulit di Hajiji ningkakaton Koporintaan Pogun kokomoi projik Talian Kapaatadan Southern Link 275kV mantad Sipitang kumaa Tawau, i nowit disio id mitingan JPPPET di nakatalib.
Minoboros isio, projik Southern Link mositi’ poindalanon om Koporintaan Pisompuruan kiguno papatahak kousinan maya’ geran sabab ilo’ nopo nga’ projik kogogonopan ginumuan i kiguno pongohon dumontol 2028 mooi do ginoris mantad duo stisin hidroelektrik wagu aanu papatahak kumaa momoguno maya’ grid pogun.
“Projik Southern Link nga’ mongingkawas ginaras katahanon sistem grid om momogonop sistem ‘gelung’ 275kV i kapasaga’ kopoikidan ginaras lotirik di lobi kakawas kumaa momoguno pomorunan agayo id Sabah,” ka disio.
Boyoon Montiri minoboros, sabaagi pomoruhang, Pelan Rikoton om Palan Induk Ginoris Sabah 2040 (SE-RAMP 204)) i posodiaon do ECoS, kopuli mogisusuai karalano’ om inggisaman montok popiadang di kopomogunaan ginoris om papatantu’ koumoligan ginoris, kogoosoan sumanganu om kopomogompian sandad posorili’, maan poimpuuno’ do amu’ no alaid.
Nokotindapou nogi’ id mitingan dilo’ i Monunurat Koporintaan Pogun, Datuk Seri Sr. Safar Untong, Kumoduo Luguan Monunurat NRECC, Dato’ Mohamad Razif Abd. Mubin, Luyar Agayo Pogun, Datuk Nor Asiah Mohd. Yusof, Monunurat Pointatap Komontirian Kousinan, Datuk Mohd. Sofian Alfian Nair, Luguan Upisor Eksekutif Suruhanjaya Ginoris Sabah (ECoS), Datuk Ir. Abdul Nasser Abdul Wahid om upisor totuo Pirompuruan om Pogun.
