Hajiji ruminamit tandamato mantad di Victor.
KOTA KINABALU: Boyoon Montiri, Datuk Seri Hajiji Haji Noor suminasi’ ababayan kinapatahakan karaja’ mantad di Kumoduo Pesuruhjaya Pulis (DCP), Mohd. Ali Tamby kuminaa id DCP Victor Sanjos sabaagi komander wagu Watas Koumoligan Pinotomod Kosilahon Sabah (Esscom).
Mohd. Ali i kososowoli di DCP Datuk Hamzah Ahmad di ko 18tw Kolimo kumaa doid Kelantan montok monowoli karaja’ Kumoduo Luguan Pulis.
Koposilihan di Victor mimpuun do ko 3tw Koturu’.
Hajiji miampai di Victor (wanan), Safar (kotolu, gibang), Hazani om bagas komander Esscom, Mohd. Ali (gibang) om i Hamzah (koduo, gibang) katalib o ababayan dilo’ id Menara Kinabalu di tadau baino’.
Ababayan toniba’ dilo’ pinapanau doid Menara Kinabalu doros hiti id tadau baino’.
Nokotindapou nogi’ i Monunurat Koporintaan Pogun, Datuk Seri Sr Safar Untong, Monguhup Montiri kumaa di Boyoon Montiri, Datuk Nizam Abu Bakar Titingan, Monunurat Hal Pogun om Ponolidikan, Datuk Awang Shahminan Awang Sahari, Potunud Koupisan Koumoligan Suang Pogun om Kotoronongon Ginumuan Bukit Aman, Datuk Hazani Ghazali om tongo’ upisor totuo Esscom.
