Hajiji Haji Noor
KOTA KINABALU: Kootusan Kuut Pokinsianan Paris montok minonilombus kasaapan Malaysia di pinomohokiman ‘timbang tara’ waris Sulu kointalangan do ningkakaton Koporintaan Pogun solinaid diti do i nopo roitan do ‘tuntutan’ (koponugatan) Sabah aiso’ nunu-nunu merit.
Minamaramit kinalantaion oponsol dilo’ i Boyoon Montiri (KM), Datuk Seri Hajiji Haji Noor minoboros, ilo’ nokopoinggirot po do nindikohon Sabah id Pisompuruan Malaysia.
Hinulit disio do mogigiyon Sabah minomili’ montok minampai pinonuridongan Pisompuruan Malaysia maya’ Pibatosan Malaysia 1963 (MA63), kohondot dilo’, nunu-nunu koponugatan labus kumaa Sabah amu’ okunan do rayat.
“Koporintaan Pogun Sabah minamaramit kootuson dilo’ om lumansan Koporintaan Malaysia maganu koinsanai laang apatut montok momupus koponugatan dilo’ montok sogigisom.
“Sabah, maya’ Koupisan Luyar Agayo Pogun tumilombus papamanau tonggungan dau miampai Luyar Negara id koponoguangan kes dilo’,” ka disio.
Di ko 6tw Koonom, Kuut Pokinsianan Paris id Perancis minonilombus kasaapan Malaysia kohondot kootusan Gonzalo Stampa, mangangadang i sinili do Kuut Sepanyol montok kes monunugat Sulu, di ko 5tw Kolimo 2020 i ointutunan sabaagi ‘partial award’.
Stampa pinopoundaliu kapangadangan kuminaa id Paris soira do Kuut Sepanyol di miagal minambatal kinoposilihan dau sabaagi moninimbang di wulan Ko’onom 2021.
Kootusan do Kuut Pokinsianan Paris dilo’ kirati do ‘pampasan’ (korugian) AS$14.9 bilion di monunugat Sulu, i po nogi’ ‘final award’ i pinatahak do Stampa katalib pinopoundaliu do kapangadangan kuminaa id Paris di ko 28tw Koduo 2022, amu’ aanu pogirotonkuasa’ kohondot do Malaysia.
