Dr. Joachim Gunsalam
KOTA KINABALU: Koporintaan monorisid ralan bobos osonong montok mongunsub popoburu’ pomuwalaian swasta diti tumonggoi gumompit id ababayan kopotundaan pomuwalaian ginumuan kos osiriba’, ka di Kumoduo Boyoon Montiri II, Datuk Seri Dr. Joachim Gunsalam.
Iti sundung pia do noilaan raramit di aramit somonu’ amu’ kounsub mantad no do sasabab kountungan di osiriba’, ka disio.
“Id inggisaman montok mongunsub kogompitan popoburu’ swasta id ponuridongan walai kos osoriba’, mogisusuai ponomuli’ om pongunsuban pinatahak kumaa popoburu’ pomuwalaain montok monuridong walai kos osiriba’ nga’ lobi yolo’ orohian montok monuridong walai ogoosan sumanganu, kos gonsuhatan om akawas montok monginggumu’ kountungan,” ka di Dr. Joachim i po nogi’ Montiri Koporintaan Koiyonon om Pomuwalain ontok minonimbar ponguhotan mantad Datuk Raime Unggi (ADUN Sinili) id pitimungan Lintuhun Undangan Pogun (DUN) Sabah, do hiti, di baino.
Raime minuhot onm nunu inggisaman do komontirian montok monoibau kobolingkahangan ponuridongan walai kos osiriba’ i nokoingkuri’ di bohogian popoburu’ walai gagama’ kinoinsawaton kos kogogonopan pamawaal id Sabah.
Dr. Joachim minoboros, gatang walai kos osiriba’ nopo nga’ id pialatan RM42,000 gisom RM55,000 iso’ unit.
Nosusuhut kinoingkawason kos babarang pomosoi di nokoinsawat om rontob gatang walai kos osiriba’ dilo’, ka disio, bohogian swasta noilaan om amu’ orohian montok mamawaal walai kos osiriba’.
“Id timpu babaino’ diti, kopoindalanan ababayan walai kos osiriba’ tumanud poinponu’ kumaa kousinan koporintaan i potuu mantad koporintaan pogun toi Pisompuruan.
“Ponuridongan walai kos osiriba’ id pogun diti poindalanon do Kotinanan Koburuon Pomuwalaian om Kakadayan (LPPB) montok kotinanan koporintaan pogun om Koporintaan Pisompuruan,” ka disio.
Montok koponuridongan walai kos osiriba’ id sahau kotinanan koporintaan pogun ilo’ nopo nga’ ababayan ponuridongan walai id tana’ sondiri’ maya’ Skim Pangalasan Pomuwalaian montok Tinimungan Kinindopuan Osiriba’ (SPPUGBR) nogi’ Skim Pangalasan Walai Anaru (SPRP) poindalanon do boogian LPPB, ka disio, gisom noondo LPPB minonuridong soginumu’ 29,219 unit walai kos osiriba’ id poliliput Sabah.
“Naamot soginumu’ 175 unit po masaan turidongon id suang Palan Malaysia Ko-12 (RMK12) diti i pikikiro opongo poinponu’ do toun 2025,” ka disio.
Naamot poruntukan mantad Pisompuruan, ababayan i powonsoiyon nopo nga’ Ababayan Pomuwalaian Rakyat (PPR) posiwaan i poindalanon do Koupisan Pomuwalaian Negara (JPN); Ababayan Pomuwalaian Pakakaraja’ Koporintaan (PPAM); om PRIMA.
