Dr. Joachim (tanga’), Isnin om Mohd Hamsan guminambar pongingitanan miampai puru karaja’ PBT Beaufort, Nakalantoi Pialaan Gerai kopihondot Ramai Tadau Raya Aidilfitri om Kaamatan nayatan Komontirian i pinaanjur id Wisma Innoprise, di tadau baino’.
KOTA KINABALU: Puru Komontirian Koporintaan Koiyonon om Pomuwalaian (KKTP) nogi’ oinsanan kotinanan id siriba’ dilo’ kaampai no Bohogian Kikuasa’ Nokoiyonon (PBT) kalansanan kaanu tumilombus mongingkawas pi’ilangan om pisokodungan sompipi’ diolo’ montok koundaran toinsanan om nogi’ rayat.
Angkab dilo’ pinolombus di Kumoduo Boyoon Montiri po nogi’ Montiri Koporintaan Koiyonon om Pomuwalaian, Datuk Seri Dr. Joachim Gunsalam id Ramai Tadau Raya Aidilfitri om Kaamatan nayatan Komontirian i pinaanjur doid Wisma Innoprise, do hiti di tadau baino’.
Ounsikou isio kokito raramit diti baino’ i pinalantoi miampai tongo’ kotinanan id siriba’ Komontirian ilo’ nopo nga’ Kotinanan Koburuon Pomuwalaian om Kakadayan (LPPB), Koupisan Pamalanan Kakadayan om Watas (JPBW), Koupisan Hal Tanak Mamasok Pogun (JHEANS) nogi’ mantad PBT ilo’ nopo nga’ Kounsol Watas Papar, Kounsol Watas Penampang, Kounsol Watas Tuaran, Kounsol Watas Putatan, Kounsol Watas Beaufort om Kounsol Watas Lahad Datu.
Dr. Joachim (tanga’) guminambar miampai di Isnin (koduo, gibang), Mohd. Hamsan (koduo, wanan) om Dr. Jamili (wanan) ontok pinapaharo kinotombuluyan id sinusulap PBT kopihondot Ramai Tadau Raya Aidilfitri om Kaamatan nayatan Komontirian i pinaanjur id Wisma Innoprise, di tadau baino’.
“Nosili kalansanan ku, mantad haro ababayan miagal diti, kopongimbulai ilo’ do sunduan piuludan om pipantangan id nayatan puru karaja’ Komontirian om nogi’ oinsanan kotinanan id siriba’ Komontirian kaampai no PBT.
“Pongonjuran i kikonsep do tongo’ sinusulap miagal idti koporonit po do piromutan di poinharo mantad id pogialatan dati’. Mantad haro o tongo’ sinusulap i aanu tombuluion i koposodia’ mogisusuai takanon pinaraat nokoposili pamaramaian duo karamaian diti kirati om aramai. Pi’ilangan om pisokodungan miagal diti nopo nga’ iso’ i kikosonongan,” ka disio.
Dr. Joachim minoboros, kopiongoi di uhu Ramai Kaamatan ilo’ nopo “Kaamatan Popoinsingubas Pisompuruan”, kapamaramaian karamaian miagal diti nop onga’ iso’ i olumis om kapanahak kosiwatan kumaa toinsanan mantad mogisusuai sinakagon, tinaru om ugama’ nogi’ mogisusuai koubasnan nakaanu minangaramai toinsanan om miniilang kinaramion.
Kapamaramaian duo karamaian diti kapasaga’ toinsanan di nokotindapou miniilang koubasanan mantad posokoton, takanon, tadat kinoubasanan om pogisusuaian di olumis, ka disio, i minonongkounsikou kumaa bohogian mongungulud linimput Wisma Innoprise tu’ minanahak kapasagaan kumaa Komontirian montok pinapaharo ababayan dilo’ di tadau baino’.
Nokotindapou nogi’ i Monguhup Montiri KKTP I om II, Datuk Isnin Aliasnih om i Datuk Mohamad Hamsan Ag. Supain; Monunurat Pointatap om Kumoduo Monunurat Pointatap I, io Datuk Dr. Jamili Nais dii Stanley Chong; Monijor Agayo LPPB, Rosemary Ahping; oinsanan Upisor Eksekutif PBT, tongo’ upisor totuo, sitaf om oinsanan puru Komontirian.
