Jahid (tanga’) guminambar pongingitanan katalib pinopoimagon Ababayan Kinapatahakan Rumah Mesra SMJ Nayatan DUN Tamparuli.
TAMPARULI: Limo unit Rumah Mesra Sabah Maju Jaya (SMJ) pinatahak do Komontirian Koburuon Labus Kakadayan Sabah (KPLBS) id watas Lintuhun Undangan Pogun (DUN) Tamparuli.
Montiri Koburuon Labus Kakadayan Sabah, Datuk Jahid Jahim minoboros, limo tinan walai nopo dilo’ nga’ wookon mantad di 1,500 unit Rumah Mesra Rakyat SMJ i rikoton montok oturidong di toun 2022.
“KPLBS nonuan tonggungan montok mongulud ababayan Rumah Mesra Rakyat SMJ om pinoindalan do Lintuhun Kakadayanagayo Kota Kinabalu, Kounsol Kakadayan, Upis Watas om Upis Watas Okoro’.
“Di toun 2022, KPLBS momorikot montok monuridong 1,500 unit Rumah Mesra SMJ om pinoikid soginumu’ 20 unit kumaa tikid DUN.
“Montok DUN Tamparuli, Upis Watas Okoro’ nokopomongo do limo unit Rumah Mesra SMJ ilo’ nopo nga’ id Kampung (Kg.) Kelian, Kg. Sri Seberang, Kg. Tambalugu, Kg. Pengasaan om Kg. Dansangai naamot i noolu’ 15 unit po maan poindalano’ do toun diti,” ka disio.
Minoboros isio dilo’ ontok pinopoimagon Ababayan Kapatahakan Rumah Mesra SMJ Nayatan DUN Tamparuli, do hiti, di tadau baino’.
Nokotindapou nogi’ i Monunurat Pointatap KPLBS, Datuk Norlijah Danin; Kumoduo Monunurat Pointatap KPLBS I, Aftar Nurajat; Kumoduo Monunurat Pointatap KPLBS II, Norsafi Dukah; Upisor Watas Tuaran, Hadzlan Jablee om i Monguhup Upisor Watas Okoro’ Tamparuli, Herman Tungginging.
Jahid po nogi’ Mobi’ Rayat Tamparuli, minoboros, tongo’ mamaramit Rumah Mesra SMJ kapaampai diolo’ i poingulud id sistem e-Kasih, pasanganu walai nakalaid, tinimungan amu’ songkuro kohimbogui (OKU) om i nokotoguang kadaaton i potuu kinotutudan, liyud toi kadaaton sandad di suai.
“Kalansanan miampai mogisusuai inggisaman, laang om ponguhupan i pinalan do koporintaan kouhup mogigiyon labus kakadayan poinpasi id koyuon di lobi osimbayan potilombus dino mongingkawas rontob koposion diolo’.
“Kalansanan kapanahakan diti kapanahak binabang kounsikohan kumaa toinsanan lolobi no kumaa tongo’ mamaramit Rumah Mesra SMJ,” ka disio.
Montok rikod, Rumah Mesra SMJ pinoimpuun di Boyoon Montiri, Datuk Seri Hajiji Haji Noor di tulan Kosiam toun nakatalib.
Ilo’ nopo nga’ inggisaman wagu id siriba’ lugu’ modal insan om kasasanangan rayat id Hontolon SMJ montok papatantu’ rayat pasanganu walai sondiri.
