KOTA KINABALU: Boyoon Montiri, Datuk Seri Hajiji Haji Noor i minonimpuun kuminaraja’ katalib minindalan kinopongiduan ‘gallstone’, di tadau baino’ minamaramit kotombuluyan apantang mantad di Monguasa’ Pulis Sabah di wagu, Datuk Jauteh Dikun id kinoiyonon pinotomod Boyoon Montiri, Sri Gaya do hiti. (Gambar)
Jauteh, 57, sinili sabaagi Monguasa’ Pulis Sabah poinggirokuasa’ ko 2tw Kolimo 2023 montok minonowoli di Datuk Idris Abdullah i nopinsin di ko 31tw Kotolu katatalib.
Id kopointalangna kumaa di Hajiji, Jauteh pinopoilo di ababayan, palan, kopoindalanan om hal i potoguang do tinimungan pulis id Sabah.
Hajiji i minongunsikou kinoposilihan di Jauteh om i Shahurinain Jais sabaagi Monguasa’ om Kumoduo Monguasa’ Pulis Sabah, otumbayaan diolo’ om tinimungan pulis kaanu papatantu’ gontob koumoligan id Sabah kotilombus poinggompi’ om oingkawasan do po’ompus timpu.
Minanahak isio jominan kumaa di Jauteh, koporintaan pogun monguhup popoinsanang koponuridongan lobi kogumu’ sulap pulis om nogi’ kopoindalanan koumoligan id poliliput pogun.
Jauteh minonongkounsikou kumaa di Hajiji om koporintaan pogun mantad sokodung ouli’ i pinatahak kumaa tinimungan pulis solinaid diti.
Minananud di Jauteh id kinotombuluyan dilo’ nopo i Kumoduo Monguasa’ Pulis Sabah di wagu, Deputi Komisioner Shahruninain Jais, Luguan Raan Pinotomod (KCK), SAC Datuk Mohd. Salleh Yahya, Luguan Koupisan Koponguludan (KJP), SAC Nik Md. Zaid Nik Omar, Luguan Koupisan Ponoriukan Kopomusalaan (KJSJ), SAC Azmi Abdul Rahim om i Luguan Koupisan Logistik, ACP Datin Laila Sagir.
