Hajiji pinapatahak toluod raya kuminaa tongo’ susumikul tahfiz om tanak yatim di nokorikot.
TUARAN: Koporintaan pogun pinopolulus kopoopuan kiginumu’ RM11.5 bilion kapaampai 89 projik i kapanahak kikiro 4,566 pakarajaan pointonod kinopogkorolihan tomporuruol Covid-19 gisom toun nakatalib, ka di Boyoon Montiri (KM) Datuk Seri Hajiji Haji Noor.
“Poingkuro po, iti amu’ kaampai projik Keluli Hijau Bersepadu kigatang RM19.6 bilion id Taman Pomorunan Tumau om Gas Sipitang (SOGIP) i sinoinan di wulan Kohopod om Iso’ 2022.
“Mantad projik Keluli Hijau diti om kopoopuan suai id kopoindalanan, Sabah karamit soginumu’ RM33.4 bilion,” ka disio ontok minonorikohon mitingan Kotinanan Koburuon Ikonomi om Kopoopuan Sabah (SEDIA) id Shangri-La’s Rasa Ria Resort, do hiti di tadau baino’.
Hajiji po nogi’ Ponorikohon SEDIA minoboros, mantad RM11.5 bilion dilo’, RM9.2 bilion nopo nga’ Kopoopuan Mitilombus Songkosuayan (FDI) om RM2.3 bilion po nopo nga’ kopoopuan saalom.
Minoboros i Hajiji, 72.9 pihatus mantad kopoopuan toi RM8.4 bilion nopo nga’ siktor kapamansaian, naamot RM1.6 bilion id siktor agayo kapaampai do pomutanaman, perlombongan, komoditi om pomukobunan, om siktor surupukaraja’, RM1.5 bilion.
Hajiji ruminuba’ dilo’ susumikul tahfiz id ababyaan mongukab puasa’ dilo’.
Kopoopuan diti nopo nga’ inggisaman notimung Kotinanan Kopoburuan Kopoopuan Malaysia (MIDA), Komontirian Kopoburuan Pomorunan om Kousahawanan Pogun (MIDE), SEDIA om kotinanan poinggompit suai, ka disio.
Noondo SEDIA id siriba’ kaganaan kuasa’ Komontirian Ikonomi miampai mitilombus, Boyoon Montiri mimang koinsanai upalai om kopoindalnaan projik id siriba’ Koridor Kopoburuan Sabah (SDC) oulud miampai lobi kosonong miampai puralan timpu di nakatantu’ om koinsanai kooturan atanud.
Koporintaan pogun mongunsikou nogi’ Inggisaman Nindopuan Mogigiyon (IPR) i pinoimpuun do Komontirian Ikonoim di ko 26tw Koduo 2023 i koponguhup monginggaan koinggoritan mogigiyon kosuul no tinimungan mosikin adalaan om tinimungan kinindopuan B40 maya’ ababayan miagal do Usahawan Tani (INTAN), Usahawan Makanan (INSAN) om Operator Perkhidmatan (IKHSAN).
Talib dilo’ i Boyoon Montiri tuminindapou do ababayan mongukab puasa’ miampai puru kotinanan SEDIA om 100 tanak yatim om susumikul mantad apat walai om longkod Tahfiz id Tuaran ilo’ nopo nga’ HOME Tuaran, Maahad Tahfiz Assohabah, Tarbiyatun Nisa, om Longkod Tahfiz Al-Quran Ash-Shabab Al-Mardhiyah hinombo do pinapatahak nogi’ isio toluod kumaa diolo’.
Nokotindapou nogi’ i Monunurat Koporintaan Pogun, Datuk Seri Sr. Haji Safar Untong, Luguan Monunuhar Komontirian Ikonomi, Dato Nor Azmie Diron, Luyar Tagayo Pogun, Nor Asiah Mohd. Yusof, Monunurat Pointatap Komontirian Kousinan, Datuk Sofian Alfian Nair, Luguan Upisor Eksekutif SEDIA, Datuk Seri Hashim Paijan, tongo’ luguan koupisan om puru kotinanan SEDIA.
