Dr. Joachim (poindikau, tanga’) guminambar miampai Puru ngaawi’ Kounsol i nakaramit Watikah Koposilihan di tadau baino’.
TAWAU: Puru ngaawi’ Kounsol Watas i wagu siliho’ miampai Bohogian Kikuasa’ Nokoiyonon (PBT) pinokianu montok monokodung koporintaan papalantoi kopoindalanan Palan Kopoburuan Hontolon Sabah Maju Jaya (SMJ).
Kumoduo Boyoon Montiri po nogi’ Montiri Koporintaan Koiyonon om Pomuwalaian, Datuk Seri Dr. Joachim Gunsalam minoboros, id hal diti, oinsanna bohgoian di poinggompit kiguno lobi kopoduli’ om aparagat doid kopoindalanan palan di pinatantu’.
“Kohondot dilo’, kalansanan ku koinsanai Puru Kounsol do misokodung sabaagi iso’ tinimungan om kitonggungan papatantu’ nunu nopo palan nogi’ angkab koporintaan noondo aanu popoindalan miampai poinsonong om kiwaya’.
“Yolo’ kiguno nogi’ do lobi kaparagat lolobi no id kapatahakan surupukaraja’ kumaa rayat,” ka disio ontok pinopoimagon Ababayan Angkat Sumpah om Kinapatahakan Watikah Kinoposilihan Puru Kounsol Watsa Lahad Datu, Semporna om Kunak di wagu montok toun 2023-2025 id Ballroom II, Bornoe Royale Hotel di tadau baino’.
Dr. Joachim minoboros, puru ngaawi’ kounsol kiguno momogonop tinan do toilaan om korotian kohondot di kapapanahan, tonggungan om karaja’ montok papasanang diolo’ popoindalan tonggungan om mamalan do koburuon.
Iti sabab no koposolihan sosongulun Puru Kounsol dilo’ kituduan monguhup PBT id kapamansaian katatapan, mamalan om miontong kopoindalanan ababayan kopotundaan id nayatan PBT, ka disio, i minoboros do Puru Kounsol nga’ ponokoruludan nogi’ id dingguluonon potilombus dino kiguno mamarati tonggungan om kapapanaho’ suai ko’ popogirot tinonggungan, kinotulidon om kopodulianan ginumuan.
“Id inggisaman manahak iso’ kosimbanon doid kopoindalanan om koponguludan PBT, karaja’ puru kounsol okon ko’ maganu toi mamaramit nopo ruputan mogigiyon, nga’ id timpu di miagal kiguno mindahu’, mooi do lobi karati di kobolingkahangan potoguang mogigiyon koiyonon,” ka disio.
Soginumu’ 56 puru kounsol di wagu sinili minamaramit watikah koposilihan diolo’ sompoopori id ababayan dilo’.
Montok Watas Lahad Datu ginumu’ Puru Kounsol di sinili nopo nga’ 20 tulun naamot montok Watas Semporna om Kunak sopipoopori do kiginumu’ 18 tulun.
Minanangkabayahan kumaa puru ngaawi’ kounsol di sinili, otumbayaan i Dr. Joachim do iti nopo nga’ sumpili’ di bobos osonong om pogiomungan momumusorou mantad tolu watas i tantu’ no do kiharo tuwa’ pomusarahan osonong kumaa kopoburuan kinoiyonon sompoopori.
“Pinoilo oku do puru kounsol wagu sinili diti mantad no do mogisusuai nawawayaan wookon nopo nga’ bagas Upisor Watas, pinsin injinior, kuntiriktor om nogi’ puru pongindopuan.
“Kopiongoi kopio do tonggungan diolo’ sabaagi popiromut do mogigiyon om bohogian kikuasa’ nokoiyonon miagal do Kounsol Watas,” ka disio i mimang di tolu Kounsol Watas dilo’ tumilombus momoguno konsep osuau moomoguno om toririmo minggisom popoinsanang pitorinaan moomoguno.
Potontuon moomoguno osontob ginawo di surupukaraja’ di patahakon, ka disio.
Nokotindapou nogi i Monguhup Montiri I, Komontirian Koporintaan Koiyonon om Pomuwalaian, Datuk Isnin Aliasnih; Puru Lintuhun Koundangan Pogun (ADUN) Kunak, Norazlina Hj Arif; Monunurat Pointatap Komontirian, Datuk Dr. Jamili Nais; Kumoduo Monunurat Pointatap II Komontirian, Faridah Giau; tongo’ Ponorikohon montok Kounsol Watas Lahad Datu, Kounsol Watas Semporna om Kounsol Watas Kunak; Firuz Idzualdeen @ Benetty Mohd Dzul, Alexander Liew om i Awang Mohd Yusoff; koinsanai Upisor Eksekutif Kounsol Watas Lahad Datu, Semporna om Kunak; Jackley Gielbert @ Lontou, Ali Adam Hj Hamjah om i Nazri Pintal nogi oinsanan sitaf komontirian.
