Salahuddin Ayub ontok pinopoindalan pinogintongan pangaba’ babarang kogugunoon id Pasar Agayo Kota Kinabalu di tadau baino’
KOTA KINABALU: Katalib pinopointutun inggisaman Menu Rahmah noondo, koporintaan mimpuun mongunsub pomorunan perhotelan popouyu Pakej Rahmah.
Tumanud Utusan Malaysia, Montiri Pidagangan Suang Pogun om Kos Sara Hidup (KPDN), Datuk Seri Salahuddin Ayub minoboros, gisom babaino’ diti iso’ no hotel i popouyu Pakej Rahmah ilo’ nopo nga’ Hotel Elopura, Sandakan i pinoimpuun di konihab.
Ka disio, maya’ Pakej Rahmah diti, bohogian hotel popouyu 20 pihatus diskaun kosongkoduanan om makan ‘sahur’ aiso’ kabayar po’ompus wulan Ramadan om iti kosili pongimbayat di tutumombului nokoiyonon om labus pogun i rumikot doid Sabah.
“Kalansanan tokou hotel ngaawi’ nongointutunan id pogun diti nga’ popouyu Pakej Rahmah mooi do ogumu’ tutumombului suang om labus pogun sumuti’ id pogun diti.
Om nogi’, monongkiboros oku miampai pomorunan perbankan montok popouyu pakej ngaawi’ perbankan kikoyuon rahmah.
“Id boogian komontirian, monguhup tokou popointutun premis i popouyu mogisuusai inggisamsan id sahau payung rahmha diti,” ka disio ontok Jelajah Rahmah di tadau baino’.
Salahuddin minoboros, gisom noondo diti soginumu’ 1,531 premis ruminojistor id sahau KPDN poliliput pogun montok popouyu Menu Rahmah.
Id Sabah, soginumu’ 105 premis ruminojistor montok popouyu Menu Rahmah om nung aanu ilo’ do mongingkawas kumaa 500 premis suang timpu duo gisom tolu po toun, ilo’ nga’ korungod.
Nga’, otumbayaan isio ogumu’ premis i popouyu inggisaman Menu Rahmah nga’ amu’ po nokorojistor miampai KPDN, mantad dilo’ unsubon yolo’ montok rumojistor mooi do bohogian komontirian koponguhup popointutun premis toi restoran poinggompit.
Minoboros isio, haro nogi’ premis i popouyu padagangan Raya Rahmah miagal id BTC Bistro Inanam i popouyu kain pasang baju kurung i kigatang RM2 somitor nung piadangon di gatang tomod ilo’ nopo nga’ RM6 toi RM7 somitor.
Nokopogulu ontok minooi intong pangaba’ babarang kogugunaan id Pasar Agayo do hiti, ka id Salahuddin, babarang pitamangan kakal padagangon id gatang pinatatap om kogumuan pangaba’ korungod.
Pipiro no babarang miagal do manuk om tontolu’ i kotoguang kobolingkahangan pangaba’, mantad dilo’ KPDN miboros miampai Komontirian Pomutanaman om Keterjaminan Takanon montok papatantu’ pangaba’ di korungod po’ompus Ramadan om dumontol Tadau Agayo Aidilfitri.
