Dr. Joachim (rulud tanga’, tanga’), Leester (rulud tanga’, kotolu mantad wanan) miampai tongo’ puru puruankuasa’ PPKSR om tombului i nokotindapou doid ababayan kinopoimpuunan koisaan dilo’.
RANAU: Kumoduo Boyoon Montiri po nogi’ Puru Lintuhun Koundangan Pogun (ADUN) Kundasang, Datuk Seri Dr. Joahcim Gunsalma pinopoimagon kinopoimpuunan Koisaan Mogigiyon Kampung Sinurai, Ranau (PPKSR) id iso’ ababayan pinapanau doid luan balairaya kampung dilo’, do hiti id kaawagu diti.
Dr. Joachim minanangkabayan kumaa di Ponorikohon Koisaan, Leester Dalimon tu’ nokoponuridong songinan koisaan mongobi’ mogigiyon kampung.
Montiri Koporintaan Koiyonon om Pomuwalaian dilo’ pinoilo mogisusuai ababayan koubasanan pinaharo pointonod di kosuabon kopihondot do kinopoimpuunan dilo’ miampai raramit di osonong kopio mantad mogigiyon kampung.
“Mamarayou oku sunduan ouli’ pinokitonan mogigiyon kampung i ounsikou kopio om raramit diolo’ kumaa ponuridongan koisaan diti di kounsub kopio,” ka disio ontok minoboros pinopoimagon kinopoimpuunan koisaan dilo’.
Ka disio, koisaan dilo’ oponsol kopio montok mongimbulai kopurimanan om monuridong asil koisaan di poinrojistor. Ilo’ nopo nga’ iso’ posunduran do mogigiyon kampung montok mogiboboros om potilombus dino popolombus atag kumaa bohogian lalansanon kopoirntaan id inggisaman popoburu’ kampung.
Kalansanan disio mooi do koisaan diti misokodung miampai di tongo[ lansanon kampung id kopoburuan kampung Sinurai om bohogian disio monguhup poinbobos sinonong id sunduk kopongupalaian poruntukan.
Dr. Joachim nga’ pinopointalang do Kampung Sinurai nokoundar kopio tu’ kinoiyonon dilo’ di kosudong montok kopoindalanan ababayan kopotundaan.
Naamot dilo’ i Leester id boboroson dau minoboros, tuduan do koisaan diti tinuridong nopo nga’ montok popogirot pisompuruan mogigiyon maya’ tongo’ ababayan di pohoroon om alapon disio oinsanan mogigiyon kampung sumompuur do PPKSR.
Suai ko ilo’, ka disio koisaan diti tinuridong montok inggisaman mongukab kosiwatan ngaawi’ ponombuluyan maya’ kinolumison koubasanan tinaru Dusun Tinagas.
I Leester nga’ pinopolombus nogi’ do koisaan diti toririmo gumura’ kopiongoi di lansanon kampung id kopomususan kopotutan tana’ adat mantad koponugkuan.
Nokotindapou nogi’ id ababayan dilo’ i Monunurat Pulitik kumaa Dr. Joachim, Yubidi Gumpoyo om lalansanon mogigiyon.
