Dr. Dionysia, Hasliza om Aliff suminain LoU id Longkod Konvensyen Kuala Lumpur, Kuala Lumpur di tadau baino’.
Timbang Presiden Totuo Koponguludan Petroleum Malaysia (MPM), Petronas, Mohamed Firouz Asnan pinopotunui tandamato kuminaa di Dr. Dionysia.
KOTA KINABALU: Koporintaan Pogun suminain do Surat Pihunungan (LoU) miampai Petronas Carigali Sdn Bhd (PCSB) om E&P Malaysia Venture (EPMV) kokomoi koponguludan Back-In Option Kontrak Pi’ilangan Kopolobusan (PSC) Blok SB409.
Mantad piniokunan LoU dilo’, Koporintaan Pogun Sabah maya’ komponi pasanganu poinponu’ dau SMJ Sdn Bhd (SMJSB) pouyuhan do Back-In Option gisom 20 pihatus koundaran kogompitan, i aanu poindalanon soira’ opongo tonggungan karaja toi kokitonan komersial, i hinombo dilo’ lobi gulu.
Poinsumpak id labus posolinsig Tisan Barat Daya Sabah kiginayo 14,556 km pasagi’, Blok SB409 pinatahak kumaa PCSB om EPMV do Petronas di maso Pusingan Pembidaan Malaysia (MBR) 2022.
LoU dilo’ sinoinan di Luguan Upisor Eksekutif SMJSB, Dr. Dionysia Aloysius Kibat, Luguan Upisor Eksekutif PCSB, Hasliza Othman om i Luguan EPMV, Aliff Anwar doid Longkod Konvensyen Kuala Lumpur, Kuala Lumpur di tadau baino’.
LoU nopo dilo’ nga’ naangayan kaawagu Koporintaan Pogun buruanon Gabungan Rakyat Sabah (GRS) posusuhut pinisoinan Pibatosan Pisokodungan Komersial (CCA) miampai Petronas di ko 7tw Kohopod om Duo 2021.
CCA kapasaga’ Koporintaan Pogun Sabah maya’ SMJSB do mongingkawas piilangan asil om kiharo kogompitan nogi’ kuasa lobi kagayo id kopolobusan tumau om gas, nogi’ piromutan gatang dilo’ id pogun diti.
Boyoon Montiri, Datuk Seri Hajiji Haji Noor minanahak jominan do CCA i kopongimbulai koyuon di lobi koposimbayan montok pomorunan tumau om gas id Sabah kaampai id labus tisan rahat om tindal, miampai pinopoilo do nosili angkab Koporintaan Pogun do Sabah kaanu lobi kogumu’ mantad kopolobusan tumau om gas dau.
Koporintaan Pogun mamaso minggisom maganu lobi kogumu’ koponguludan miampai Petronas i pahabaron id timpu toruhai.
