Abdul Ghani (Poindikau, tanga’) miampai di Syaheddrul (gibang), Lo (poindikau koduo, wanan) om i Hamid (koduo, gibang) guminambar miampai tongo’ mongongobi’ peneroka i nokotindapou id Ababayan Kinapatahakan Nindopuan kumaa tongo’ peneroka Apas Balung om Merotai.
TAWAU: Kotinanan Koburuon Tana’ Pogun Sabah (LKTNS) minambayar soginumu’ RM21,299,702 dividen toun 2022 kuminaa soginumu’ 908 mororobuat (peneroka) id Watas Kosilahon, ka di Ponorikohon dilo’, Datuk Abd Ghani Mohamed Yassin.
Ka disio, mantad ginumu’ dilo’ soginumu’ do RM8,399,210 nopo nga’ tobungan di peneroka i poikidon tikid koompokon toun.
Tumanud disio, pulampai dividen peneroka nopo nga’ RM1,955 sombulan, katalib di rikoton RM1,600 sombulan.
“Mantad ginumu’ dilo’, soginumu do 261 peneroka Ladang Apas Balung / Merotai minamaramit dividen kiginumu’ RM9,895,034.
“Mantad tintob dilo’, soginumu’ RM4,362,801 nopo nga’ tobungan, naamot pulampai nindopuan nopo nga’ RM3,715 sombulan,” ka disio id Ababayan Simbolik Kinapatahakan Nindopuan Peneroka montok Ladang Apas Balung om Merotai id upis Ababayan Ikonomi Tambahan (AET) LKTNS, Apas Balung, do hiti di tadau Kolimo.
Abdul Ghani om Monijor Agayo LKTNS, Syaheddrul R Joddari pinapatahak dividen dilo’ kuminaa di tongo’ peneroka nongokomoi.
Ababayan dilo’, sinasi’ nogi’ di Puru Parlimen Tawau, Lo Su Fui om i Puru Lintuhun Koundangan Pogun (ADUN) Balung, Datuk Hamild @ Hamid Haji Awang.
Naamot dilo’, lumansan i Syaheddrul do kinopoikidan nindopuan dilo’, kopongunsub di tongo’ peneroka tumilombus monokodung koinsanai inggisaman i poindalanon do LKTNS montok no do koundaran om jominan timpu dumontol toinsanan.
Nokotindapou nogi’ id ababayan dilo’ i nuludan Mongungulud Otuo LKTNS om tongo’ peneroka Ladang Apas Balung om Merotai.
