Presiden Parti Gagasan Rakyat Sabah (Gagasan Rakyat), Datuk Seri Hajiji Haji Noor sinuau di bagas presiden parti, Stephen Jimbangan ontok nokorikot id SICC, Kota Kinabalu, di tadau baino.
KOTA KINABALU: Boyoon Montiri, Datuk Seri Hajiji Haji Noor miampai pohimagon minonowoli kopomuruanan Parti Gagasan Rakyat Sabah (Gagasan Rakyat) nosusuhut Mitingan Agayo Pinotomod (EGM) parti dilo’ di tadau baino;.
Hajiji po nogi Ponorikohon Gabungan Rakyat Sabah (GRS) minoboros, mantad do laang diti oinsanan puru do babaino’ kiharo pawayaan do pulitik i 100 pihatus nokoiyonon montok monilombus kopoburuan diolo’ kumaa rayat om pogun.
“Duo koyuon osuul Gagasan Rakyat i nosili hal koimbayat doho om koombolutan montok mogiamung id parti diti nopo nga parti orukut tinaru i mogowit do angkab ínklusiviti’ om parati rolou tanak Sabah i monimbuat do angkab kopoburuan nokoiyonon,” ka disio.
Iti nga hal i nokopotungkayan koombolutan id GRS montok mamaramit osikap Gagasan Rakyat sabaagi tambalut komponen kaawagu diolo, ka disio id EGM Gagasan Rakyat i notindapou di lobi 150 puru id Longkod Konvensyen Sompomogunan Sabah (SICC), do hiti.
“Koduo nopo, yolo (parti komponen GRS) alaid no do pinopolombus angkab mooi do GRS kosili impohon nokoiyonon id rati komoyon di otopot, ilo nopo nga koinsanai tambalut kosili parti nokoiyonon.
Diti noondo yati 100 pihatus nokoiyonon,” ka disio.
Suai ko ilo, minoboros i Hajiji, ababayan Gagasan Rakyat nga kopiongoi nogi di apat tukod kopoburuan GRS – Sabah First (Sabah Posuulon), Sabah Foward (Sabah Lumaang id Toguang), Sabah Prosper (Sabah Maju Jaya om Sabah United (Sabah i Osompuru).
Hajiji minoboros, sabaagi songinan parti nokoiyonon okon ko’ kirati dati’ magada ababayan nasional toi monolikud koponsolon pogun.
“Malaysia nopo nga’ pomogunan tokou. Nga, miagal di tuduan sandad tokou monuridong Malaysia nopo nga montok monimban gontob kopotundaan rayat om pogun Sabah.
“Do baino diti, toun 2023, kopihondot kouliton toun 60 toun kinoponuridongan Malaysia, otumbayaan yahai do impohon nokoiyonon nopo nga i bobos osonong montok Sabah.
“Nga minomili tokou om pinapatantu do karalano nokoiyonon kaanu poposindak ababayan kopoburuan om koponsolon pogun id suang Pisompuruan Malaysia. Mimang tokou kopoindalanan sistem federalisme di lobi kigatang om kirati miampai mimpau kumaa Koundangan Pisompuruan om Pibatosan Malaysia 1963 (MA63).
“Mantad no do hal dilo’, misokodung yahai di nombo-nombo boogian i mamaramit om poposuul koponsolon Sabah.
“I lobi koponsol montok dati nopo nga maganu kopongokunan om kopoindalanan kopotutan, kuasa nogi nindikohon osuul Sabah miampai di poinsuang id undang-undang bobos akawas pogun ilo nopo nga Koundangan Pisompuruan, undang-undang i minonuridong Pisompuruan Malaysia, ilo nopo nga MA63. Aiso Malaysia nung aiso no MA63,” ka disio.
“Ounsikou kopio yahai sabab kopomuruanan bobos akawas pomogunan, Luguan Montiri, Datuk Seri Anwar Ibrahim pointopot kopio montok popoindalan tonggungan Putrajaya montok monumboyo MA63. Amu po isio nokopongigit karaja solinaid 100 tadau nga nokito tokou no kinomogoton di atalang. Tumilombus tokou mongingkawas pisokodungan miampai Koporintaan Pisompuruan montok monuridong Sabah om Malaysia Madani di progresif,” ka disio.
Hajiji minoboros, pointalangon disio miampai lobi kosorisid rikoton do Gagasan Rakyat ontok kopoimpuunan parti dilo do ko 2tw Kotolu diti.
Gagasan Rakyat monuridong do iso’ nuludan kotinanan parti doid koinsanai 73 DUN kaampai koponuridongan sayap Koonduan, Komulakan om Sukod Wagu Koonduan (Beliawanis).
Mitingan agayo tikid toun raan om bohogian sopipoopori nakatantu do tulan Koturu om Kosiam, miampai Kongres Tikid Toun do wulan Kohopod om Iso.
Hajiji minonongkounsikou kumaa di bagas presiden parti, Stephen Jimbangan om kopomuruanan parti dilo mantad kotumbayaan diolo kumaa disio om kinosodiaan lumubuk montok koundaran Sabah om rayat dau.
pinapahabar nogi isio nuludan kopogulu Kounsol Akawas Gagasan Rakyat miampai i lobi dilo silihon id timpu toruhai.
Presiden Parti Gagasan Rakyat Sabah (Gagasan Rakyat), Datuk Seri Hajiji Haji Noor om Puru ngaawi kounsol akawas parti guminambar miampai tongo mongongobi parti id Mitingan Agayo Pinotomod (EGM) i pinaharo id SICC, Kota Kinabalu, di tadau baino.
