Hajiji tinanud dio’ Joniston dii Goh minamagaur Yee Sang kopihondot Ababayan Walai Poingukab kopihondot Toun Wagu Sina’ Watas Tuarna, id Lintuhun Sri Sulaman, Tuaran, do hiti di songkosodop. Nokotindapou nogi’ i Puru Parlimen Tuaran, Datuk Wilfred Madius Tangau om ADUN Pantai Dalit, Datuk Jasnih Daya.
TUARAN: Koporintaan Pogun nokopowonsoi di bobos osonong montok popoburu’ pogun id sahau Palan Kopotundaan Hontolon Sabah Maju Jaya di toun 2022 miampai nakalantoi minomuhu asil omok RM7 bilion gisom baino’ diti, ka di Boyoon Montiri (KM) Datuk Seri Hajiji Haji Noor.
Gisom ko 31tw Kohopod om Duo katatalib ka disio, soginumu’ RM6.96 bilion asil nopuhu do Koporintaan Pogun.
“Kinopomuhuan bobos agayo pointonod nokopomorinta’ sondiri diti kopokito Koporintaan Pogun do babaino’ diti nokopowonsoi di bobos osonong, potilombus dino iti kirati do nokopongulud tokou do pogun diti miampai poinsonong.
“Amu’ tokou mimpulitik nopo nung poiradon nodi suai i koilo no mimpulitik om mokimaanu nindikohon nogi’ karaja’. Oilaan ku do haro i mumbal magahou koporintaan maya’ ralan di amu’ kohunung.
“Nga’, ounsikou oku sabab nakaanu tokou minonoibau koinsanai pinongumbalan om kaantaban dilo’ mantad no do haro sokodung ouli’ koombolutan mantad PH (Pakatan Harapan) nogi’ wookon tambalut mantad UMNO om BN (Barisan Nasional).
Sokodung dilo’ sabab no do koilo yolo’ kaanu tokou mongulud kousinan pogun miampai osonong,” ka disio.
Minoboros isio dilo’ id Ababayan Walai Poingukab Kopihondot Karamaian Toun Wagu Sina Watas Tuaran doid Lintuhun Sri Sulaman do hiti, di songkosodop.
Boyoon Montiri minoboros, ponginsomokan osuau mangangapu’ i ginuno Koporintaan Pogun nokounsub nogi’ do kinoingkawason kinosuangon kopoopuan kumaa pogun diti.
“Minongukab tokou kosiwatan agayo kumaa mangangapu’, montok rumikot id pogun diti do mongimbulai lobi kogumu’ kosiwatan ikonomi om potilombus dino pakarajaan kumaa tangaanak Sabah.
“Iti nopo nga’ wookon inggisaman dati’ montok mononduli’ kawagu ikonomi pogun i noumpadan katalib tomporuruol Covid-19 om mogigiyon kaanu masi id koyuon di osonong om ounsikou.
“Orohian oku nogi’ do manahak jominan kumaa rayat lolobi no kumaa mogigiyon Tionghua do koporintaan noondo diti tumilombus popowonsoi di bobos osonong maya’ Hontolon SMJ monotk papatantu’ Sabah koburu’ om rayat kiharo kosiwatan id pogun diolo’ sondiri’,” ka disio.
Pinopolombus nogi’ i Hajiji kounsikohan di kinorikotan ogumu’ rayat orukut tinaru om ugama’ montok minampai mamaramai Toun Wagu Sina’ miampai mogigiyon Tionghua id Tuaran.
“Potontuon tokou piuludan om pisompuruan id nayatan rayat orukut tinaru om ugama’ kotilombus oinggirotan,” ka disio i minoboros do amu’ insan kolihu mogigiyon Tionghua id Tuaran sundung pia do atangkangau karaja’ tadau-adau.
Nokotindapou nogi’ i Monguhup Montiri Ponombuluyan, Koubasanan om Sandad Posorili’ po nogi’ Puru Lintuhun Koundangan Pogun (ADUN) Kiulu, Datuk Joniston Bangkuai; Puru Parlimen Tuaran, Datuk Wilfred Madius Tangau om i ADUN Pantai Dalit, Datuk Jasnih Daya om Ponorikohon Manganganjur, Frankie Goh.
