Dr. Maximus (kolimo mantad gibang) miampai Monontuduk Agayo PBS, Tan Sri Joseph Pairin Kitingan, tongo’ Kumoduo Presiden PBS, Datuk Seri Dr. Joachim Gunsalam (kotolu, gibang) om i Datuk Seri Dr. Yee Moh Chai (koduo, gibang), Monunurat Agayo, Datuk Julita Majungki, Luguan Kopointalangan, Datuk Joniston Bangkuai om tongo’ lansanon totuo suai minongunsikou Kotobian Toun Wagu Sina’ kumaa oinsanan puru om rayat Sabah i mamaramai dilo’.
KOTA KINABALU: Datuk Seri Dr. Maximus Ongkili nonuan kotumbayaan poinponu’ montok tumilombus momuruan Parti Bersatu Sabah (PBS).
Nakaramit isio undian ouli’ rolou id mitingan Kounsol Takawas parti do hiti, di tadau baino’.
Mantad diti, Dr. Maximus i minongigit karaja’ dilo’ do aiso’ pinitondingan id pomilian parti di tulan Ko’onom toun nakatalib, tumilombus momuruan parti.
Id Pitimungan Mongongobi’ PBS ko-36 om ko-37, pinapahabar isio do sumunsuri sabaagi Presiden parti id suang timpu tolu toun.
Minonongkounsikou kumaa puru mantad sokodung om kotumbayaan potilombus diolo’, Dr. Maximus minoboros, maganu do timpu montok mongintutun monowoli disio.
Katalib minonorikohon Mitingan Kounsol Takawas i kumoiso’ toun diti, ka di Dr.Maximus, mongigit isio palan mantad montok mongiliu karaja’ Presiden id suang timpu tolu toun, toi, ka disio: “… miagal di pinatantu’ do Kounsol Takawas.”
“Sundung do nakapahabar oku montok sumunsuri do toun pomilian (PBS) obontol, (nga’) puru Kounsol Takawas minongundi’ doho’ montok tumimporon.
“Iti kapanahak PBS timpu di korungod montok mongintutun monowoli doho’,” ka disio.
Ka wagu di Dr. Maximus, haro ogumu’ lansanon omulok id parti i kaanu monuridong om mogowit parti kumaa gontob lobi kasawat, soira’ orikot o timpu dilo’.
