Hajiji (kotolu, gibang) miampai di Speaker Dewan Koundangan Pogun (DUN) Sabah, Datuk Seri Haji Kadzim M. Yahya om Montiri Karaja’ Pinotomod om Koponguludan, Datuk Dr. Haji Mohd. Arifin Mohd. Arif id kinorikotan disio id Linimput Lintuhun Koundangan Pogun Sabah montok tuminindapou Mitingan Pinotomod DUN Sabah (Kapawaladan Rang Undang-Undang Suruhanjaya Tenaga Sabah 2023 om Rang Undang-Undang Bekalan Gas 2023), di tadau baino’.
KOTA KINABALU: Boyoon Montiri, Datuk Seri Hajiji Haji Noor ‘nakalantoi’ Undi Percaya (Undi Otumbayaan) soira’ Pitimungan Pinotomod Lintuhun Koundangan Pogun (DUN) Sabah di tadau baino’ pinopolulus duo Rang Undang-Undang (RUU) kapaampai ginoris.
Goduduo RUU dilo’ pinawalad i pinawalad di Boyoon Montiri nakaanu sokodung 44 Puru Lintuhun Koundangan Pogun (ADUN) di nokotindapou, potilombus dino nokopokito kinogiroton sokodung kumaa kopomuruanan di Hajiji.
Soginumu’ 35 ADUN ilo’ nopo nga’ 13 mantad Barisan Nasional (BN) Sabah, 19 (Parti Warisan) om tolu mantad Parti Kesejahteraan Demokratik Masyarakat (KDM) amu’ nokotindapou.
RUU nopo dilo’ nga’ kapaampai do RUU Suruhanjaya Tenaga Sabah 2023 i kapanahak kuasa’ kumaa Suruhanjaya do popoindalan tonggungan kapanamangan montok siktor kapangabaan gas id pogun Sabah, om nogi’ RUU ‘Bekalan Gas’ 2023.
RUU dilo’ kapasaga’ do Koporintaan Pogun poinsanganu kuasa’ do manamong siktor kapangabaan gas id pogun diti miampai lobi kiwaya’.
Ka di Hajiji, kapatahakan kuasa’ manamong gas kumaa Koporintaan Pogun Sabah nopo nga’ iso’ mantad pokionuon id sahau Pibatosan Malaysia 1963 (MA63).
Daamot dilo’, pogulu pinoulian kuminaa doid Kuala Lumpur di totuong tadau Koiso’, i Luguan Montiri Datuk Seri Anwar Ibrahim i pinapaharo pinirubaan miampai di 44 ADUN i monokodung di Hajiji pinopolombus sokodung disio kumaa di Hajiji montok tumilombus momuruan Sabah.
Haiji tuminabi’ di Montiri Koburuon Labus Kakadayan Pogun, Datuk Jahid Jahim ontok tuminindapou Mitingan Pinotomod DUN Sabah (Kapawaladan Rang Undang-Undang Suruhanjaya Tenaga Sabah 2023 om Rang Undang-Undang Bekalan Gas 2023), di tadau baino’.
“Onuan tokou kosiwatan kumaa Boyoon Montiri montok minoboros om mogihum ralan di osonong montok koundaran Sabah,” ka disio soira’ rinubaan media katalib pinirubaan dilo’ id koiyonon pinotomod Luguan Montiri, Sri Gaya.
Pinointalang nogi’ di Anwar do RUU i minaan pawalado’ baino’ oponsol om koowit kosimbanon agayo kumaa Sabah.
