Dr. Joachim (tanga) pinapatahak T-shirt PBS kuminaa dilo songulun puru wagu om poingintong i Sahrol (koduo, gibang).
TAWAU: Poburuon Parti Bersatu Sabah (PBS) kakal kosudong id kopoburuan om mongumolig tongo’ kopotutan tulun Sabah, ka di Kumoduo Presiden PBS, Datuk Seri Dr. Joachim Gunsalam.
Mantad dilo’, pinokianu disio oinsanan puru parti do tumilombus kumaraja’ agaras montok papatantu’ parti kotilombus agaras id kopoburuan montok Sabah om Sabahan.
“Kiguno tokou kumaraja agaras montok momoruhang puru wagu id inggisaman monginggirot nindikohon PBS kaampai no id watas diti,” ka di Dr. Joachim i po nogi’ Kumoduo Boyoon Montiri ontok pinopoimagon Mitingan Agayo Tounan (AGM) Ko-38 PBS Bohogian N.73 Sebatik i pinapanau id Kampung Murut, Ulu Kalabakan, do hiti di tadau Koonom (3tw Koonom).
Dr. Joachim (gibang) om i Sahrol guminambar pongingitanan id AGM dilo’.
Soginumu’ kikiro 380 puru mongongobi’ om mio’ontong tuminindapou AGM dilo’.
Id mitingan dilo’, Dr. Joachim minongunsikou nogi’ kinosuangon soginumu’ 661 puru wagu PBS.
Raan i minamaramit kosompuruan wagu sopipoopori do raan Jalan Polis, 70 tulun; Jalan Masjit, 102 tulun; Kg. Mangga, 90 tulun; Pintu Gerbang, 100 tulun; Jalan Sk Kalabakan, 110 tulun; Jalan Atas Bukit Kalabakan, 89 tulun om Kg Ulu Murut Kalabakan, 100 tulun.
Dr. Joachim minoboros, PBS nga posodia’ nogi’ montok monoguang Pomilian Agayo Pogun (PRN) nung pohoroon do soiraira’ timpu.
Otumbayaan nogi isio do Longkod Pogun Indonesia ilo’ nopo nga’ Nusantara soira’ do koindalan kapanahak waya di osonong kumaa mogigiyon id watas Sebatik om pototongkop Tawau, kaampai no Ulu Kalabakan id sunduk koburuon.
Dr. Joachim (tanga) ruminamit foom kosompuruan om sinasi’ di Sahrol (koduo, gibang).
“Koyuon ikonomi poliliput watas diti kosimban om puru ngaawi’ PBS do hiti kiguno maganu kosiwatan diti montok popoburu’ tinan, paganakan om parti,” ka di Dr. Joachim i po nogi’ Montiri Koporintaan Koiyonon om Pomuwalaian.
Minanangkabayahan isio kumaa di Luguan Bohogian Sebatik, Sahrol Mahoolop nogi’ puruankuasa’ manganganjur i pinapalantoi AGM diti baino’.
Nokotindapou nogi’ i Luguan Bohogian PBS Kadamaian, Demis Rumanti; Timbang Exco Tinimungan Komulakan, Shahrun Nidzam Sharoom; om i Monunurat PBS Kundasang, Japli Sami.
