Zahid (kotolu, gibang) pinapatahak toluod kumaa susumikul B40.
KOTA KINABALU: Komontirian Desa om Wilayah (KKDW) papatahak RM600 riong montok kopoburuan koiyonon mosikin id Sabah.
Kumoduo Luguan Montiri I po nogi’ Montiri KKDW, Datuk Seri Dr. Ahmad Zahid Hamidi minoboros ginumu’ dilo’ montok popoburu’ Tongod, Kota Marudu om Pitas.
“Maya’ pinibarasan miampai Luguan Montiri, insonongan tokou kogogonopan id watas dilo’ wookon nopo maya’ do ababayan Kapangabaan Lotirik Labus Kakadayan (BELB) om Pangaba’ Waig Labus Kakadayan (BALB).
“Suai ko’ monginsonong toi mamawaal walai tongo’ mosikin, KKDW nga’ miontong nogi’ di projik pomorunan miampai popoindalan pisokodungan kopoburuan mongungusaha’ om nogi’ koperasi,” ka disio ontok kapahabaran media Ababayan Ramah Mesra Miampai Maktab Rendah Sains Mara (MRSM) Kota Kinabalu.
Pinopoilo nogi’ i Zahid do pongusin RM50 riong montok projik monginsonong om mongundar Institusi Balajaran MARA (IPMA) toun 2023.
“Kopuli ilo’ do RM25 riong kumaa MRSM, RM17 riong kumaa Institut Komilaan MARA (IKM) om Kolej Komilaan Takawas MARA (KKTM) naamot RM8 riong po kumaa Kolej MARA (KM) om Kolej Abaal MARA (KPM).
“Oondos tokou nogi’ sabab MARA om MRSM kiharo topong balajaran di osonong om iti no i kiguno tokou do gompion kaampai no id sunduk kogogonopan om ponuang dilo’,” ka disio.
Suai ko ilo’, pinapahabar nogi’ i Zahid do MRSM Kota Kinabalu ointutunan sabaagi MRSM Tan Sri Musa Aman sabaagi mamagatang tonggungan bagas Boyoon Montiri Sabah dilo’ id kinopoburuan do MARA.
Nokotindapou ngoi’ i Montiri Pinsingilaan Takawas Malaysia, Datuk Sri Dr. Noraini Ahmad; Ponorikohon MARA, Datuk Dr. Asyraf Wajdi Dusuki om i Potunud Yayasan Sabah, Datuk Ghulam Haidar Khan Bahadar.
