Dr. Joachim (poindikau, kowalu’ gibang) guminambar pongingitanan miampai tongo’ Puru Kounsol Kakadayan Tawau id Ababayan Angkat Sumpah om Kinapatahakan Watikah Koposilihan doid Lintuhun Sri Tawau, di tadau baino’.
TAWAU: Puru ngaawi’ Kounsol miampai Bohogian Kikuasa’ Nokoiyonon (PBT) pinokianu mongukab tongo’ kaganaan wagu i kaanu mogowit koburuon ikonomi om kasasanangan mogigiyon id watas di haro id siriba’ tinonggungan diolo’.
Kumoduo Boyoon Montiri po nogi’ Montiri Koporintaan Koiyonon om Pomuwalaian, Datuk Seri Dr. Joachim Gunsalam minoboros, ilo’ pogi’ do kiguno yolo’ sumosodia’ do mongukab kaganaan wagu suai ko’ tumoguang di mogisusuai kaantaban montok koburuon toisoiso’ koiyonon montok manhaak kosimbayanan om surupukaraja’ bobos osonong kumaa mogigiyon.
“Puru ngaawi’ Kounsol Watsa kiguno papamanau tonggungan id kopoburuan ikonomi om kasasanangan mogigiyon sabaagi koporintaan kotolu id nuludan kopomuruanan koporintaan,” ka disio id Ababayan Angkat Sumpah om Kinapatahakan Watikah Koposilihan Puru Kounsol Kakadayan Tawau (MPT) i pinaharo doid Lintuhun Sri Tawau, do hiti, di tadau baino’.
Minanangkabayahan kumaa koinsanai Puru Kounsol i minamaramit watikah kinoposilihan diolo’, Dr. Joachim minoboros, tonggungan dilo’ awagat om oponsol sabab yolo’ nopo nga’ lansanon kumaa mogigiyon id kinoiyonon sompoopori.
Tumanud disio, nuludan puru kounsol lolobi no i wagu kiguno mogilo rikoton PBT om Katatapan Koporintaan Pogun id kopoindalanan tinonggungan diolo’ sompoopori.
“Inggonopan tinan di toilaan om korotian di kogunaan, tonggungan om karaja’ di poingigit, opoduli’ di hal ngaawi’ koporintaan nokoiyonon, opusou di kobolingkahangan mogigiyon nokoiyonon om mongilo koyuyuon pososorili’ om pomogunan,” ka disio.
Dr. Joachim (kaapat, wanan) ruminamit tandamato mantad id Joseph om poingintong ii Isnin (kotolu, wanan), Dr. Jamili (koduo, wanan) nogi’ tombului di nokotindapou doid Ababayan Angkat Sumpah om Kinapatahakan Watikah Koposilihan doid Lintuhun Sri Tawau.
Kalansanan disio, puru ngaawi’ kounsol manahak poinponu’ tonggungan kumaa karaja’ wagu diolo’ miampai monguhup Presiden om oinsanan puru karaja’ MPT id kopoindalanan koinsanai karaja’ om ababayan pamalanan i masaan om i maan poindalano’.
“Kumaraja’ no miagal ‘tamalang om rungib’ (aur dengan tebing), mooi do oinsanan tonggungan di pinalan aanu popoindlaan do lobi kosikap om kiwaya’,” ka disio.
Pinosotol disio, kinoposilihan diti okon ko’ pokirayahan tu’ ilo’ nopo nga’ iso’ tonggungan di oponsol monotk monguhup mogigiyon watas Tawau.
“Kinoposilihan diti nga’ okon nogi ko’ kosiwatan montok koundaran tinan sondiri’, tambalut toi puru paganakan sompoopori. Nga’, tonggungan oinsanan puru nopo awagat om oponsol kopio montok timpu dumontol watas Tawau. Puru ngaawi’ kounsol kiguno tumilombus opoduli’ di kogugunoon om koponsolon ginumuan nogi’ tinonggungan montok popouhup pomusarahan om kabaahan id kopoburuan om kopoingkawasan naangayan surupukaraja’ MPT,” ka disio kawagu.
Dr. Joachim lumansan, diolo’ kaanu kumaraja’ sabaagi iso’ tinimungan, montok miuhup miampai presiden om koinsanai puru karaja’ MPT.
“Miampai di Presiden, tongo’ upisor totuo om koinsanai puru karaja’ MPT, puru ngaawi’ kounsol nopo nga’ tungolig om toruntud do kopoindalanan koporintaan pogun suai ko’ monokodung om monguhup ogirot i patahakon do nuludan kukumaraja’ surupukaraja’ koporintaan pogun Sabah i binuruan di Monunurat Koporintaan Pogun, Datuk Seri Sr. Safar Untong.
“Kohondot dilo’, agayo kalansanan ku mooi diolo’ i sinili kaanu papamanau tonggungan sabaagi piromutan om popoinsanang id pialatan MPT om mogigiyon id pogun Sabah diti potilombus dino kapabantug PBT mimpau do tinoggungan, dinamik om opoduli’. Iti kopiongoi di slogan Sabah Maju Jaya montok mogowit angkab, kosongonuan toinsanan om tinonggungan tikid tanak Sabah montok papalantoi ababayan kopotundaan pogun,” ka disio.
Suai mantad dilo’, sabaagi lansanon mogigiyon, pinokianu disio oinsanan Puru Kounsol montok mindahu’ mintong koyuon otopot nogi’ mamarati kogugunoon mogigiyon id kinoiyonon sompoopori.
Nunsub nogi’ disio o nuludan kopomuruanan wagu diti do katama’ popowonsoi kosimbanon kumaa koundaran om koburuon PBT nogi’ kaanu popoindalan tonggungan koporintaan om mogigiyon nokoiyonon i nobian miampai poinponu’ tinonggungan.
Nokotindapou nogi’ i Monguhup Montiri I Koporintaan Koiyonon om Pomuwalaian Sabah, Datuk Isnin Aliasnih; Monunurat Pointatap Komontirian, Datuk Dr. Jamili Nais; Puru Lintuhun Koundangan Pogun (ADUN) Balung, Datuk Hamild @ Hamid Hj. Awang; ADUN Kukusan po nogi’ Monunurat Pulitik kumaa Montiri Kousinan Sabah, Rina Jainal; Presiden MPT, Joseph Pang; Kumoduo Monunurat Pointatap II Komontirian, Faridah Giau; tongo’ Luguan Koupisan Pisompuruan om Pogun, tongo’ Lansanon Kopotundaan Mogigiyon om tongo’ Upisor Otuo MPT.
