Hajiji Haji Noor
KOTA KINABALU: Koporintaan Pogun pinoposodia’ RM97.5 riong kumaa Komontirian Komulakan om Sipoot montok kopotundaan komulakan om sipoot, monginsonong kogogonopan spoot om koposodiaan pinsingilaan sains sipoot toun diti.
Boyoon Montiri, Datuk Seri Hajiji Haji Noor minoboros, iti kopokito tonggungan Koporintaan Pogun montok popoburu’ kopotundaan sipoot id Sabah.
“Sabaagi Boyoon Montiri Sabah, mokimokito oku do Sabah kopongimbulai lobi kogumu’ atlet om puru sipoot i kopogowit kobontugan sipoot kumaa pogun om pomogunan tokou.
“Ogumu’ i osonong naangayan om kopoondos Sabah om watas id kaganaan sipoot pomogunan om sompomogunan,” ka disio id ababayan kinopoimpuunan Pialaan Ragbi Borneo Sevens 2023 id Longkod Konvensyen Sompomogunan Sabah (SICC), do hiti di tadau baino’.
Boboroson disio binasa’ di Kumoduo Boyoon Montiri II po nogi’ Montiri Koporintaan Koiyonon om Pomuwalaian, Datuk Seri Dr. Joachim Gunsalam.
Boyoon Montiri minoboros, koposuulan nga’ kiguno nogi’ do patahakon kumaa sipoot miagal do ragbi mooi do bakat tomulok aanu momologkus om oluda’.
“Sabah, miagal di noilaan tokou nosili no do iso’ ‘power-house’ sipoot ragbi id Malaysia om oondos kopio kopio sabab tiim ragbi kusai Sabah osonong naangayan om luminantoi do Trofi Agong i nabantug gisom noondo diti.
Iti no ponokotanda’ osonong montok ragbi id pogun diti om mokimokito oku tiim rabgi tokou kosimbuat kumaa gontob di lobi kasawat,” ka di Hajiji.
Boyoon Montiri minoboros, miampai do Koisaan Ragbi Sabah om Kelab Ragbi Eagles wookon moninimpuun id kopoindalanan karalano’ om modul kaawagu id kopotundaan sipoot, mongiikiro isio do timpu dumontol di osonong montok pomoinan dilo’ do hiti.
“Ounsikou oku nokoilo do Ragbi Sabah nakapatatap sitandod id kopotundaan sipoot i kiguno ombitanan ginumuan,” ka disio.
Otumbayaan i Hajiji do upisor Ragbi Sabah kiharo ginoris montok papaanjur Borneo Sevens miampai kiwaya’, i po nogi’ ababayan i nookunan do Ragbi Asia.
“Miampai kinorikotan tiim labus pogun nointutunan om tiim bobos osonong Malaysia monongkiala’ id pialaan diti, pominat sipoot kosuul no pominar ragbi opokitanan di naangayan osonong ragbi do tulan Kotolu dumontol.
“Otumbayaan oku do Borneo Sevens kotilombus koinggayo om kosili ababayan i kalendar pialaan monotk oinsanan tiim ragbi id ponong koiyonon diti,” ka disio.
