Ewon Benedick
KOTA KINABALU: TEKUN Nasional pinopoindalan ababayan wagu kosuul montok tongo’ mongungusaha’ i mongindapu’ suang piromutan maya’ Skim Kapanakadaian Online TEKUN (SPOT), mimpuun toun diti, ka di Montiri Kopotundaan Mongungusaha’ om Koperasi Datuk Ewon Benedick.
Minoboros isio, mongungusaha’ i mongindapu’ id suang piromutan nga’ aiso’ porojistoran pongindopuan, kasaga’ maganu ponguhupan kousinan gisom RM5,000 om RM10,000 montok di poinrojistor miampai SSM.
“Di toun 2022, TEKUN Nasional pinopoindalan Skim Kapanakadaian Informal Mikro (SPIM) ilo’ nopo nga’ kapanakadaian aiso’ gontob kountungan toi ‘zero interest’ i nakapanahak koundaran kumaa sognumu’ 31,934 tulun mongungusaha’ om gatang kinapatahakan sakadai soginumu’ RM258 riong.
“Maya’ kopoindalanan skim diti, mongungusaha’ informal i aiso’ permit om koporojistoran pongindopuan, kasaga’ maganu sakadai gisom RM5,000 om RM10,000 montok di kiharo permit om poinrojistor miampai SSM,” ka disio.
Minoboros isio dilo’ id kinopomolopian titah Diraja Mitingan Kumoiso’, Penggal Koduo Dewan Rakyat Parlimen Ko-15 id Kuala Lumpur, di tadau baino’.
I Ewon minoboros, suai dilo’, upalai koponguhupan id sahau Amanah Ikhtiar Malaysia (AIM) nga’ amu’ nogi’ pinapatatap di mongungupalai do mositi’ kiharo koporojistoran SSM.
“Mongungupalai kiguno nopo do monuang foom mongupalai miampai popotonggoi dokumen poinggompit miagal do kupi kad kointutunan, kupi kad kointutunan sawo toi waris om kupi buuk akaun,” ka disio.
Minoboros isio, Bank Rakyat nga’ pinoposodia’ nogi’ soginumu’ RM50 riong montok kopoindalanan Ababayan Kapanakadaian Mikro montok Papadaadagang om Mongingindapu’ Okoro’ 2.0 i poukabon nogi’ kumaa mongungusaha’ informal om mikro i aiso’ permit toi koporojistoran pongindopuan.
“Gisom di ko 9tw Koduo 2023, soginumu’ 2,066 koponguhupan i pinolulus id sahau ababayan diti miampai gatang koinsanai soginumu’ RM46.427 riong,” ka disio.
