KOTA KINABALU: Koupisan Ponginsadaan Sabah pinapalabus notis kopoingatan kinoingkawason ‘Red Tide’ (Alga Aragang) nosusuhut kinokitonan alga aragang id pipiro koiyonon kowoigan tisan rahat pososorili’ Kota Kinabalu om Tuaran.
Koyuon i minintonod mantad kinoinggumuon ponit alga atantu’ i kopongimbulai toksin kopoligogon i kopongumpadan mamaamasi marin om kolidasan tulun.
Kumoduo Boyoon Montiri po nogi’ Montiri Pomutanaman, Ponginsadaan om Pomorunan Takanon, Datuk Seri Dr. Jeffrey Kitingan minoboros, kinohinoon ‘Margalefidinium polykriskoides’ (Cochlodium) om alga ‘Pyrodinium bahamense’ noilaan maya’ sampel waig i nanu mantad pipiro kinoiyonon id pososorili’ Kota Kinablu om koiyonon suai di ko 16tw Koduo 2023.
“Koyuon Alga Aragang i sasaru’ aantakan id kowoigan Tisan Kotonobon Sabah lolobi no id Sipitang, Kuala Penyu gisom Tuaran toi Kota Belud. Kaantakan diti ingkuuri’ aantakan id kowoigan Tisan Kosilahon Sabah om aiso’ nokoruput lobi 20 toun,” ka di Dr. Jeffrey id iso’ kointalangan di tadau baino’.
Notis kopoingatan i pinalabus dilo’ tumanud di buris puralan om kooturan di nakatantu’, nokopokito kinoloputon alga aragang masaan naantakan id kowoigan Kota Kinabalu om pikikiro kopogkoroliu kumaa kowoigan Tuaran.
Ginumu’ kinopidoton sel sonliter montok tikid sampel nopo nga’ mogisuai-suai id tikid kinoiyonon. Rontob koligogon adangon soira’ ginumu’ sel katalib 2,000 sonliter montok alga Margalefidinium polykrikoides om 800 solinter montok alga Pyrodinium bahamense.
Pinointalang di Dr. Jeffrey, sundung alga Maralefidinium polykrikoides amu kopoligogon kumaa tulun, nga’ kopoligogon ilo’ kumaa sada’, lolobi no i gompion id kurungan.
“Kinoloputon miampai kinopidoton sel di akawas koowit kapataion sada’ di ogumu’ sabab sada’ momuhobo maya’ tasang, om alga i kosokot id tasang kosonsong pomuhoboan,” ka disio.
Notis kopoingatan dilo’ sabaagi kapasarahan kumaa momomogompi’ id koiyonon Kota Kinabalu om Tuaran mooi do mingat-ingat om mongilag kapataion sada’ i koowit do korugion.
Sabalik dino, alga Pyrodinium bahamense koponinong koligogonon kumaa tulun. Toksin mantad Pyronidium bahamense kotimung doid tongo’ kakahut, om soira’ ilo’ do aakan tulun, koowit kumaa Kowonitan Kerang Lumpuh (PSP).
“Tanda’ PSP kaampai no amarod, orodon, om miagal nolonuk id kabang, munung om dila’, susuhutonon do oruol tulu, oinggolou, soluhan om mongilob. Id kes di adalaan, koowit ilo’ do kotingkodon momuhobo, om ‘koma’ om nogi’ kapataion. Mantad dilo’, tulun ginumuan pokionuon do amu’ mangakan nunu-nunu ponit kakahut mantad koiyonon i naantakan gisom haro kopoilaan posusuhut,” ka disio.
Montok mongingkuri’ waya’ do ruab, Koporintaan Pogun Sabah maya’ Koupisan Ponginsadaan minaganu pipiro laang kaampai no mogodu naamot kopongonuan, kapadagangan om pomogunaan tongo’ kakahut mantad koiyonon di naantakan.
Minamason nogi’ isio tulun ginumuan mooi do amu’ mingka’au id kowoigan pososorili’ Kota Kinabalu om Tuaran gisom onuan pononsunudan, om minoboros, koporintaan miontong do koyuon om manahak kointalangan kaawagu nung nuru’.
Suai ko ilo’, pinoposorou isio tulun ginumuan do kaantakan alga aragang nopo nga’ kaantakan sandad i osubuanan di koyuon miagal kosimbanon tawan om ababayan tulun, miagal do koponosomuan om koponginsadaan do poindadala’.
“Oponsol montok tulun ginumuan do mongilo kaantakan di poinggompit do koyuon alga aragang om maganu laang mingat-ingat i kiguno montok mongumolig kolidasan diolo’ om sandad posorili’,” ka disio.
Koupisan Ponginsadaan tumilombus madtamong koyuon dilo’ om maganu laang potilombus nung nuru’ montok papatantu’ koumoligan om kotilombuson intodonon taakanon rahat tokou,” ka disio.
Minongunsub nogi’ isio monginginsada’ om mongingindapu’ takanon rahat do mananud kooturan kopoindalanan pinatantu’ i pinatatap do bohogian kikuasa’ om papatantu’ produk diolo’ oumolig do akanon.
“Oinsanan tokou mositi’ papapamanau tonggungan tokou do manamong kolidasan om kasasanangan mogigiyon, om montok mongumolig do pogiromutan pangaba’ takanon tokou,” ka disio.
