Jamawi (poindikau kaapat, gibang) guminambar miampai tongo’ mamaramit ponguhupan balajaran om molohing i nokotindapou id ababayan Kinapatahakan dilo’.
TENOM: Soginumu’ 19 susumikul mantad Lintuhun Undangan Pogun (DUN) Melalap i nakaramit kopouyuhan mongoput pinsingilaan kumaa kotinanan pinsingilaan akawas montok kopongonuan wulan Koiso’ nakaramit ponguhupan balajaran id iso’ ababayan Kinapatahakan doid Longkod Surupukaraja’ ADUN Melalap, do hiti, di tadau baino’.
Montiri Pomutanaman, Ponginsadaan om Pomorunan Akanon i po nogi’ Puru Lintuhun Undangan Pogun (ADUN) Melalap, Datuk Jamawi Jaafar minoboros, ponguhupan dilo kopohompit susumikul i mongoput balajaran id nayatan diploma om ijazah, sabaagi kopongoputan ababayan ponguhupan balajaran i alaid no poindalano’ doid Koiyonon dilo’.
“Id fasa iso’ diti, soginumu’ 19 susumikul minamaramit ponguhupan om kalansanan ku koponginggaan ilo’ do okuuri’ tonggungan molohing nogi’ kouhup pabalanjaan osopung tangaanak tokou soira’ mongoput pinsingilaan kumaa id univositi do tohuri,” ka disio ontok minoboros id ababayan dilo’.
ka di Jamawi, ponguhupan dilo’ okon i ko’ kituduan monguhup susumikul id kousinan, nga’ nogi’ pongunsub kumaa sukod wagu id Melalap do tumilombus monugat toilaan om monigampot kalantaion akademik.
Jamawi (kotolu, wanna) pinapatahak Ponguhupan Balajaran DUN Melalap kuminaa di Farah Hanim minongobi’ di taka’ dau i mongoput pinsingilaan kumaa nayatan ijazah.
Pinoporikot nogi’ isio pason di Boyoon Montiri om pinopoio do Koporintaan pogun poposodia’ mogisusuai inggisaman ponguhupan balajaran montok susumikul i mongoput balajaran kumaa kotinanan pinsingilaan akawas.
ka disio, wookon ponguhupan i pinosodia’ nopo nga’ ponguhupan kousinan miampai insan pabayaro’ (one-off) kiginumu’ RM2,000 kumaa susumikul ijazah om RM1,500 kumaa susumikul diploma.
“Suai dilo’, susumikul mantad tinimungan B40 nga’ kaanu nogi’ mongupalai ponguhupan komputer, naamot susumikul i tumanud pinsingilaan id kampus doid siriba’ Koporintaan, nga’ kosudong mamaramit ponguhupan tikit pontuludan soginumu’ RM600 sontoun,” ka disio.
Jamawi pinopoimagon Tenom Champions League JJCUP 2025/2026.
Jamawi pinoposotol do kosiwatan om kogogonopan ponguhupan balajaran i pinosodia’ Koporintaan nuru’ poilaan miampai poinpuli kumaa mogigiyon, tu’ kakap ogumu’ susumikul om molohing i amu’ nokoilo kinohoron do ponguhupan dilo’.
Kohondot dilo’, pinokianu disio momuruan mogigiyon id nayatan Kampung kaampai Molohingon Kampung, ponorikohon Puruankuasa’ Komogoton om Koumoligan Kampung (JKKK), Luguan Mamasok Pogun om Mobi’ Luguan Mamasok Pogun do papamanau tonggungan papatayad do kointalangan dilo’ kumaa mogigiyon nokoiyonon.
Id ababayan sopisuai, i Jamawi pinopoimagon Tenom Champions League JJCup 2025/2026 tinanud di Lansanon Koburuon Mogigiyon (PPM), Densely Justin; Upisor Eksekutif Wats Tenom, Mumin Amsah om pipiro Lansanon nokoiyonon DUN Melalap.
