Mitingan Puruankuasa’ Pirundingan Kapanahakan Pinotomod Nayatan Upisor pialatan Koporintaan Pisompuruan om Koporintaan Pogun Sabah pinonorikohon dio’ Safar dii Johan id Upis Monunurat Koporintaan Pogun doid Menara Kinabalu. Nokotindapou nogi’ i Brenndon om tongo’ upisor otuo.
KOTA KINABALU: Koporintaan Pisompuruan om Koporintaan Pogun Sabah di tadau baino’ pinapaharo mitingan kumoinsan Puruankuasa’ Pirundingan Kapanahakan Pinotomod id nayatan upisor montok miniboros pogintangan kawagu gatang Kapanahakan Pinotomod Sabah, kopiongoi di Perkara 112C om 112D Koundangan Pisompuruan, nosusuhut Ponuhuan Kuut Akawas kitadau 17tw Kohopod 2025.
Mitingan dilo’ pinonorikohon dii Monunurat Koporintaan Pogun Sabah, Datuk Seri Sr. Safar Untong id koobian koporintaan pogun om i Luguan Monunurat Perbendaharaan, Komontirian Kousinan Malaysia, Datuk Johan Mahmood Merican minongobi’ koporintaan Pisompuruan.
Nokotindapou nogi mantad koporintaan Pisompuruan i upisor totuo kaampai Dato’ Sri Ab Rahim Ab Rahman, Potunud Belanjawan Negara; Zulkhairil Amar Mohamad, Kumoduo Potunud Belanjawan Negaral; Marzaitul Azura Mokhtar, Luguan Bohogian Ponolidikan, Koupisan Luyar Negara; Mohd. Saiful Sungkih Abdullah, Monunurat Bohogian Haal Sabah & Sarawak, Koupisan Luguan Montiri; om Norali @ Ag. Norali Ag. Damit, Upisor Kousinan Pisompuruan, Perbendaharaan Malaysia.
Koporintaan pogun Sabah nopo nobian di upisor otuo kaampai Datuk Brenndon Keith Soh, Luyar Agayo Pogun Sabah; Datuk Nor Asiah Mohd. Yusof, Monontuduk Undang-Undang kumaa Boyoon Montiri; Datuk Mohd. Sofian Alfian Nair, Monunurat Pointatap Komontirian Kousinan Sabah; Datuk Jasmine Teo, Potunud Unit Mamalan Ikonomi Pogun Sabah; om pipiro upisor otuo suai mantad Koupisan Luyar Agayo Pogun om Komontirian Kousinan Sabah.
Id kointalangan goduo, Safar om Johan pinopoilo, goduduo bohogian kaakun do pibarasan di tadau baino’ diti ponokotanda’ kotimpuunon di kiwaya’ om oulud, miampai piupakatan montok mogintong kawagu Kapanahakan Pinotomod Sabah tumanud ‘formula’ 40 pihatus asil oburisi Pisompuruan miagal poinsuang id Perkara 112C om 112D Koundangan Pisompuruan.
“Mitingan nopo diti nga’ laang osopung i oponsol id kopotontuan pogintangan kawagu Kapanahakan Pinotomod koindalanan miampai oulud om abaal,” ka diolo’.
Goduduo bohogian nga’ pinoposotol nogi’ do tonggungan montok monilombus pibabarasan miampai ‘progresif’, miampai sunduan piuhupan, sopipantang om sopihunung, kaampai piilangan data om kointalangan kousinan i gunoon montok monokodung proses pogintongan kawagu.
Suai dilo’, mitingan diti komoyon sabaagi impohon ogirot montok monigampot panalasaian di aadang om aadas montok goduduo bohogian, kopiongoi di pokionuon Koundangan Pisompuruan.
Minoboros yolo’, kalantaion pinibabarasan osopung diti kopokito kosodiaan koporintaan pogun montok miuhup miampai koporintaan Pisompuruan montok koponsolon rayat Sabah.
“Koporintaan Pisompuruan pointopot montok papatantu’ pibarasan koindalan miampai otulid om tumanud kooturan koundangan,” ka diolo’.
Mitingan potilombus pikikiro kapanahak koposuulan kumaa piilangan data kousinan om koponguludan ‘metodologi’ pongintaban Kapanahakan Pinotomod, montok papatantu’ formula di opiokunan aanu popoindalan miampai kopunong om kiwaya’.
Koporintaan pogun om Pisompuruan lumansan pibarasan diti koowit asil di koposontob, koponumboyo’ kopokionuan undang-undang, nogi’ mongingkawas kasasanangan rayat Sabah.
