Hajiji miampai puru Sabah Law Reform Advisory Council (SLRAC) id kinoiyonon pinotomod diti, Seri Gaya, Kota Kinabalu, di tadau baino’. Yolo’ nopo nga’ i Datuk Roger Chin Ken Fong, Dr David Fung Yin Kee, Janice Junie Lim om luyar totuo Jeyan Marimuthu. Nokotindapou nogi, Luyar Agayo Pogun, Datuk Brenndon Keith Soh.
KOTA KINABALU: Koporintaan Pogun minamaramit kotontuan Kuut Akawas i pinapasaga’ upalai kopogintongan kawagu kohokiman do Sabah Law Society (SLS) kohondot kopotutan Sabah kumaa geran pinotomod 40 pihatus mantad koporintaan Pisompuruan.
Boyoon Montiri, Datuk Seri Haji Hajiji Haji Noor minoboros, kotontuan dilo’ kopohimagon kopotutan Sabah miagal di poinsurat id Koundangan Pisompuruan, kosuul no id siriba’ Perkara 112C om 112D.
“Alaga’ yahai di kotontuan Kuut Akawas i minonuhu’ koporintaan Pisompuruan do popoindalan pogintangan kawagu kohondotgeran montok toun-toun di amu’ nabayaran id timpu 90 tadau. Kotontuan diti kopohimagon kopotutan Sabah miagal i poinjamin doid Perlembagaan (Koundangan),” ka disio.
Hajiji minoboros, kinalantaion dilo’ nga’ kopohimagon nogi’ do tonggungan oponsol koporintaan pogun i potitilombus momusus om poposotol kopotutan koundangan Sabah.
Pinointalang disio do inggisaman poómpus koporintaan pogun id kopointalangan rikod susuyan kahandaman, kaampai ‘Share of Growth of Federal Revenue Derived from Sabah’ montok timpu 1964 gisom 1968, nakapapanau tonggungan oponsol id kinoposotolan do angkab om komoyon Perkara 112C om 112D kotilombus amu’ kosimban.
“Pomoromitan bayaran ‘interim’ winonsoi miampai amu’ koponginraag kopotutan koundangan pogun,” ka disio pinoposotol.
Hajiji minoboros, pointonod kolimpuunon po, id tikit mitingan Malaysia Agreement 1963 (MA63) i pinonorikohon di Luguan Montiri, koporintaan Sabah miampai ouli’ om ogirot popotoguang kopokionuan kohondot kopotutan Sabah.
“Pinoburu’ dahai haal diti do amu’ notiitingkod maya’ tikid pawaya’an pinotomod, tikid mitingan MA63 i pinonorikohon di Luguan Montiri, nogi’ maya’ mogisusuai surat pinotomod i pinaatod kumaa Putrajaya. Amu’ insan pia yahai pinopologos haal diti do noundorongan.
“Mantad kotontuan diti, kalansanan dahai koporintaan Pisompuruan monumboyo’ tonggungan dau miagal di nopiokunan ontok pinonuridongan Malaysia,” ka disio.
Boyoon Montiri pinoposotol do koporintaan pogun miboros miampai koporintaan Pisompuruan montok popoindalan ponuhuan Kuut id sunduan piuhupan om sopipantang, montok papatantu’ kopotutan koundangan Sabah aanu monigampot poinponu’.
Minamarayou nogi isio laang do SLS minogowit haal diti kuminaa kuut sabaagi iso’ haal kikoponsolon ginumuan.
Hakim Kuut Akawas Datuk Celestina Stuel Galid id kootusan dau di tadau baino’ minonuhu’ nogi’ do goduduo koporintaan Pisompuruan om pogun monigampot piokunan id timp 180 tadau mantad tadau pinonuhuan dilo’, miagal di pinokianu doid siriba’ Perkara 112D Koundangan Pisompuruan.
