Dr. Joachim Gunsalam
KOTA KINABALU: Parti Bersatu Sabah (PBS) minamaramit osonong om monokodung poinponu’ kotontuan kisusuyan kahandaman Kuut Akawas i minongobi’ kumaa Sabah Law Society (SLS) id kes koponugatan kopotutan 40 pihatus asil oburisi’ pisompuruan id siriba’ Perkara 112C om 112D Koundangan Pisompuruan.
Kootusan dilo’ pinopohimagon tonggungan koundangan om moral koporintaan Pisompuruan montok monumboyo’ nunu i nopiokunan id siriba’ Pinibatosan Malaysia 1963 (MA63) nogi’ nimpohon pinonuridongan Pisompuruan Malaysia.
Ponowoli Presiden PBS, Datuk Seri Dr. Joachim Gunsalam minonongkounsikou om minanangkabayahan kumaa SLS mantad ginirot nogi’ kinobulunon diolo’ minogowit haal diti id kuut.
“PBS mamason bayahan kumaa SLS tu’ minomusus kopotutan rayat Sabah miampai poinponu’ tinonggungan. Kootusan diti okon nopo ko’ kinalantaion id sunduk undang-undang, nga nogi’ kinalantaion montok sunduan kaadangon, kaadason, om tambalut ponokokungsi ogirot miagal i pinabatos id MA63,” ka disio id kointalangan di tadau baino’.
Dr. Joachim pinoposotol do kootusan diti kopokito do nunu i alaid no pinoburu’ do rayat Sabah – do kopotutan 40% okon i ko’ kosuulon, nga’ kopotutan koundangan i pinajamin kumaa Sabah.
“Solinaid somok limo nohopod toun, kopotutan diti linihuan om tiningkadan. Noondo norikot nodi timpu dau do popohunung kinalawongon susuyan kahandaman diti om popoindalan batos koundangan di nokosurat,” ka disio.
PBS nga’ minokianu nogi’ koporintaan Pisompuruan do mananud poinponu’ ponuhuan kuut montok monimpuun pogintangan kawagu id suang timpu 90 tadau om monigampot piokunan miampai koporintaan pogun id suang timpu 180 tadau kohondotginumu’ asil montok toun 1974 gisom 2021.
“Ponuhuan kuut diti mositi’ do pantangon miampai aiso’ nunu-nunu padaahan toi kopourutan. Kaadangon di notingkadan nopo nga’ kaadangon di olimon,” ka disio pinoposotol.
Minoboros nogi’ isio do haal diti i kotolibamban do piwolitan pulitik om apatut koponompuru oinsanan lansanon Sabah id kopomususan kopotutan pogun mantad sunduk koundangan om kousinan.
“PBS mantad di pogulu poinggirot popoburu’ koponondulian tongo’ kopotutan Sabah id siriba’ MA63. Kootusan nopo diti nga’ laang oponsol kumaa kopogulian piadangan id Pisompuruan Malaysia,” ka disio kawagu.
PBS pinoposotol sokodung poinponu’ dau kumaa SLS om tinan kohokiman i pinopoudong bantug undang-undang om nogi’ minomusus nindikohon Sabah id suang Malaysia.
“Logoson kotontuan diti kosili titik impuunon kumaa timpu wagu i mimpau kinotulidon om kaadangon pialatan Sabah om koporintaan Pisompuruan. Katalib 48 toun, norikot nodi timpu dati’ mamantang pinibatosan om monimbuat koundangan,” ka di Dr. Joachim.
